O campus acollerá en setembro un curso sobre as utilidades de Linux na docencia universitaria

Á volta do verán os docentes do campus de Vigo terán a oportunidade de formarse no emprego de Linux para a docencia universitaria nun curso para o que o período de matrícula permanecerá aberto ata o vindeiro 2 de setembro.

A finalidade é familiarizar ao profesorado con este sistema operativo de software libre, que lle outorga a liberdade de usar o programa, de estudar como funciona e poder modificalo, que é o obxectivo destas ferramenta de código aberto, que permiten ademais distribuír copias do programa e incluso melloralo.

Esta iniciativa está encadrada dentro das actividades da antiga Vicerreitoría de Formación e Innovación Educativa e ten un número de prazas máximo de 20 persoas. A docencia impartirase os días 6 e 9 de setembro de 10:00 a 14:00 horas e o 13 do mesmo mes de 10:00 a 12:00 horas. Durante estas dez horas de duración explicarase aos usuarios habituais de Windows que Linux ofrece as mesmas funcionalidades, é igual de doado en canto ao seu manexo, e é de balde. A metodoloxía empregada será fundamentalmente de prácticas guiadas e todo o material do curso estará permanentemente dispoñible na web.

Programa do curso

As dez horas de docencia comprende cinco temas ou bloques de contidos. Primeiramente os asistentes achegaranse a este sistema operativo cunha introdución na que poderán coñecer a instalación ou o ámbito de escritorio. Seguidamente, o profesor Xosé Antón Vila Sobrino falaralles sobre o sistema de arquivos, permisos, configuración do contorno. O terceiro tema será a administración do sistema, os usuarios, a rede, os periféricos, a xestión de paquetes,…. Nunha terceira quenda poderán coñecer as utilidades varias do Linux como a compresión de arquivos, copias de seguridade, mensaxería instantánea e multimedia. Finalmente, o curso rematará cunha clase sobre como obter axuda e información.Os interesados en matricular neste curso deberán facelo a través de Bubela.