A Universidade e o Colexio de Avogados de Pontevedra asinaron un convenio para impartir esta titulac
O campus amplía o seu perfil formativo co Máster en Avogacía
O alumnado que remate o Grao en Dereito deberá cursalo para poder exercer a profesión
A oferta académica “singular” do campus de Pontevedra increméntase para o vindeiro curso co Máster Universitario en Avogacía, que acreditará aos titulados en Dereito para poder exercer a súa carreira profesional como letrados ou procuradores. Esta formación no campus será posible grazas ao convenio de colaboración que este luns asinou o reitor, Salustiano Mato, co decano do Colexio de Avogados de Pontevedra, Ramón Jaúdenes López de Castro, un novo título “que revitaliza a oferta formativa da cidade e permite combinar o rigor e a calidade académica da Universidade coa práctica profesional dos que a exercen”, subliñou o reitor.
O Máster Universitario en Avogacía, que comezará a impartirse no vindeiro mes de setembro, responde a unha esixencia normativa de ordenanza europea na que o alumnado saído das facultades de dereito deberá cursar estes estudos para poder obter a capacitación necesaria para exercer como avogado ou avogada, “un paso co que cumprimos o novo decreto pero que tamén coincide coa idea central da Universidade de que os nosos estudantes teñan unha formación completa dende as aulas e dende o contacto co mundo real profesional”, apuntou Mato. Para o decano do Colexio de Avogados de Pontevedra, con este convenio de colaboración dáse resposta “a unha vella preocupación da avogacía española patente xa dende os anos setenta como é a acreditación profesional ao remate dos estudos de licenciatura”.
O curso impartirase entre a Facultade de Ciencias Sociais e da Comunicación e a Escola de Práctica Xurídica de Pontevedra e ofertará entre 25 e 30 prazas no primeiro curso, “respondendo á media de colexiación do Colexio de Avogados de Pontevedra”, sinalou María Teresa Pazo Currás, directora da Escola de Práctica Xurídica de Pontevedra. A parte teórica do mestrado será impartida polos profesores da Universidade de Vigo, mentres que a práctica quedará en mans do Colexio “que conta cunha experiencia contrastada na formación de letrados dende 1985, ano no que se fundou a Escola de Práctica Xurídica da cidade”, engadiu Ramón Jaúdenes López de Castro.
Doutoramento para o curso 2013-2014
A decana da Facultade de Ciencias Xurídicas e do Traballo, Ana María Pita, sinalou que, unha vez establecido o Máster en Avogacía, o seguinte reto será ofrecer para o curso 2013-2014 o programa de doutoramento “abríndolles as portas a aqueles avogados que queiran acceder a esta oferta de terceiro ciclo ou afondar no estudo teórico dunha determinada materia”, sinalou a decana. Deste xeito, o mestrado non só será de interese para os novos graduados ou graduadas “senón tamén para aqueles profesionais da avogacía que queiran achegarse ao doutoramento”, engadiu Mato.A sinatura deste convenio de colaboración únese aos xa rubricados polo reitor a semana pasada cos Colexios de Avogados de Ourense e Vigo, “o que achegará unha uniformidade e un equilibrio en todo o desenvolvemento do mestrado, pondo en común ensinanzas e aproveitando experiencias”, explicou Ana María Pita.