Campus do Mar amosa o corazón e a alma dos millóns de persoas que piden un Campus de Excelencia Internacional

Recoñecemento do traballo de centos de persoas ao longo de moitos meses. Aberta reivindicación dun recoñecemento. Recordatorio dos alicerces sobre os que asenta o proxecto, pero sobre todo posta en valor do seu corazón e da súa alma. Durante os dez minutos ao longo dos que se prolongou a súa exposición, o reitor da Universidade de Vigo, Salustiano Mato, trasladou ás máis de trescentas persoas que hoxe se deron cita na sede do Consejo Superior de Investigaciones Científicas, a esencia do Campus do Mar, “o campus que o mar se merece”, dixo Mato, “un mar que falou e que o fixo para dicirnos que nos elixira”.
En presenza de presidentes de comunidades autónomas e dunha ampla representación dos sectores político, económico e social e das restantes delegacións das 21 universidades que concorren á convocatoria de Campus de Excelencia Internacional 2010, Mato lembrou os apoios acadados por un proxecto “multipaís, multicultural e plural” e asegurou que “hoxe estamos aquí para dicirlles que queremos un Campus de Excelencia Internacional para Campus do Mar”.

Finalizada a presentación, a cuarta nunha relación de 22 universidades que deu comezo coas intervencións do ministro de Educación e da ministra de Ciencia e Innovación, tanto o reitor como resto de integrantes da delegación viguesa, así como co conselleiro de Educación, Jesús Vázquez , expresaron o seu convencemento nas posibilidades do proxecto de acadar a cualificación de Campus de Excelencia Internacional, así como a súa materialización nun proceso no que segundo o reitor “non se dará un paso atrás”.

O corazón e a alma do Campus do Mar

Nun discurso articulado en dúas partes enlazadas cun vídeo no que se puña de manifesto o amplo apoio acadado polo Campus do Mar ao longo dos últimos meses, Salustiano Mato incidiu nas principais cifras dun proxecto no que traballarán máis de 3100 investigadores, 23 institucións e máis de 1350 doutores. Así mesmo lembrou o seu obxectivo de incrementar nun 10% a contratación entre empresa e agregación de I+D e destacou que a Escola Internacional de Posgrao do Mar “porá especial enfoque na atracción de talento procedente de América Latina e Asia e cun forte compromiso de cooperación para o desenvolvemento de África”.

Pero máis alá das cifras e dos socios que conforman o proxecto, Mato, descubriu hoxe o “corazón e a alma do Campus do Mar que representa a de millóns de persoas que apoian, desexan e piden un Campus de Excelencia Internacional ”. Na súa intervención o reitor da Universidade de Vigo situou ao mar como protagonista dunha lenda que corre nos últimos meses por Galicia e o Norte de Portugal e que afirma que “o mar falou e o fixo para dicirnos que nos elixira. Tamén se di que os homes escoitárono. Eu creo que a lenda é certa e estou aquí para traerlles a súa voz. E espero que vostedes tamén a escoiten”.
Partindo da convicción de que o galego é un pobo elixido polo mar, Mato lembrou os séculos de relación entre o home e o mar e manifestou publicamente o compromiso de “seguir coñecendo e aprendendo do mar, a compartir o aprendido e a acoller a todos aqueles que xunto a nós queiran conquistar un futuro mellor”.

Convicción nun proxecto gañador

“É un proxecto destinado a gañar”. Con esta palabras expresaba o alcalde de Vigo, Abel Caballero, unha vez finalizada a intervención de Salustiano Mato, a súa confianza nas posibilidades de Campus de Mar de se converter en Campus de Excelencia Internacional. “Seguro que non hai un proxecto coas características que atesoura o Campus do Mar”, sinalou Caballero referíndose en especial ao seu aval científico e apoio social.

Pola súa banda o director do Instituto Español de Oceanografía, Eduardo Balguerías, destacou a gran coherencia do proxecto, asegurando que “é o único que ten esta homoxeneidade”. Balguerías, que incidiu na necesidade de seguir a investigar o mar que definiu como “a derradeira fronteira”, lamentou con ironía que un proxecto así “non se nos ocorrese antes”.

O conselleiro de Educación, Jesús Vázquez, felicitou ás universidades de Vigo e Santiago pola presentación da cadanseu proxecto que definiu como “vitais” e manifestou o seu desexo e anhelo en que sexan una realidade. “Se é co selo de calidade ben”, dixo Vázquez e se non, buscaremos medios”.

Os reitores das universidades de Santiago de Compostela e A Coruña, promotores xunto á Universidade de Vigo, o CSIC e o IEO do proxecto de Campus do Mar manfiestaron a súa implicación con el. “Os socios estamos a morte co proxecto”, asegurou José María Barja, reitor da Universidade de A Coruña para quen “se gaña un, gañamos todos”. Pola súa banda Juan Casares Long, reitor da Universidade de Santiago de Compostela, destacou a importante base científica dun proxecto que considera contribuirá “a facer una Galicia mellor”.

Mentres o coordinador institucional en Galicia do Consejo Superior de Investigaciones Científicas, Uxio Labarta, agradeceu á Universidade de Vigo o lanzamento do Campus do Mar, ao tempo que destacou as posibilidades que se derivan a posta a disposición por parte da Xunta dos terreos da ETEA.

Ademais de manifestar a súa convicción nas posibilidades do proxecto, o reitor da Universidade de Vigo, separou a decisión que sobre a cualificación como Campus de Excelencia Internacional adoptará o Comité Internacional de Expertos do acordo que con Coalición Canaria e o Partido Nacionalista Vasco acadou o Goberno para a aprobación dos orzamentos de 2011. “Espero que non teña que ver porque hai un comité externo apropiado para este contexto”, dixo o reitor que reiterou que “queremos o recoñecemento para acadar máis velocidade nun proceso no que non haberá un paso atrás”. A resolución do Comité Internacional de Expertos farase pública o vindeiro xoves día 21.

Campus de Excelencia Internacional: un proxecto de estado

Como un “gran proxecto de estado e país e un gran estímulo” definiu o ministro de Educación, Ángel Gabilondo, o Campus de Excelencia Internacional que asegurou é “un gran éxito e esforzo das universidades”. O ministro felicitou a todas as institucións universitarias que concorreron á convocatoria de 2010, un total de 49, das que 22 pasaron á fase final. Na súa intervención na apertura do acto de presentación dos proxectos, Gabilondo aproveitou para poñer de manifesto a necesaria conexión entre a sociedade e a universidade á que referiu como “un factor determinante para o desenvolvemento local e autonómico”.

Pola súa banda a ministra de Ciencia e Innovación, Cristina Garmendia, reivindicou o papel da universidade na transferencia de coñecemento ao tempo que avogou por vencer o illamento “mediante a agregación”. Tras achegar os detalles das acreditacións Severo Ochoa postas en marcha polo seu departamento, a ministra afirmou que a súa carteira quedara excluída do plan de axuste do Goberno que si afectou a outras partidas orzamentarias. “Isto significa unha aposta do Goberno que nos permitirá manter os niveis de investimento no Plan de I+D, priorizando o coñecemento e a innovación”, afirmou a ministra.

Pola súa banda o presidente do CSIC, Rafael Rodrigo e o secretario de Estado de Universidades, Màrius Rubiralta, avogaron pola especialización como medio para ancorar ás universidades ao seu entorno ao tempo que aseguraron que a través dos CEI “estamos a construír a nova cartografía do coñecemento”.

22 aspirantes á excelencia e algunhas referencias ao mar

Comezando pola Universidade de Santiago de Compostela e finalizando coa Universidad Rovira i Virgili de Tarragona, unha tras outra discorreron sobre o escenario do salón principal da sede do CSIC na madrileña rúa Serrano, os representantes dos 22 proxectos que aspiran a se converter en Campus de Excelencia Internacional.
Campus Vida foi o primeiro proxecto en presentarse da mna do reitor da USC, Juan Casares Long e do director do IDIS da USC, Carlos Diéguez. Un proxecto que na pasada convocatoria dos CEI acadou a designación de campus rexional e que en palabras de Casares aspira a ser “un referente global das ciencias da vida”.

Xunto á proposta de Vigo, o Campus Atlántico Tricontinental das universidades canarias de La Laguna e Las Palmas e o Campus Mare Nostrum das universidades de Murcia e Cartagena, fan referencia ao mar nas súas propostas aínda que compartindo protagonismo con outras áreas do coñecemento como a astrofísica e a biomedicina no caso de Canarias e a bioeconomía e as tecnoloxías sanitarias no de Murcia.

Discurso inicial do reitor, Salustiano Mato (24 Kb)

Discurso de peche do reitor, Salustiano Mato (20 Kb)