Diario da Universidade de Vigo
No Forum do Mar, feira especializada para profesionais dos sectores relacionados
O Campus do Mar preséntase en sociedade en Oporto
Mantivéronse reunións con institucións de países como Marrocos, Eslovenia, Cabo Verde, Irlanda ou Lu
Stand do Campus do Mar no Forum do Mar
O director do Campus do Mar, Emilio Fernández, nunha das entrevistas
Acuario montado no Forum do Mar polos técnicos da ECIMAT
No camiño de aumentar a visibilización e estreitar lazos cos parceiros do outro lado do río Miño, o Campus do Mar presentouse estes días en sociedade en Portugal no marco do Forum do Mar. Trátase dun evento organizado por Océano XXI-Cluster do Conhecimento e da Economia do Mar, un aliado estratéxico do Campus do Mar no país veciño, que se celebrou en EXPONOR entre o 16 e o 19 de xuño. Alí déronse cita profesionais dos diferentes sectores que integran a economía do mar, a comunidade científica e a sociedade en xeral para contribuír no desenvolvemento da economía do mar e para a sensibilización do público nos beneficios que se poden obter a partir da exploración sostible do recurso Mar.
Cun posto propio nesta feira, o Campus do Mar deuse a coñecer no país luso informando a todos os visitantes sobre o proxecto, os seus obxectivos e a súa potencialidade como agrupación transfronteiriza de docencia, investigación e transferencia - varias das universidades implicadas neste proxecto de excelencia son as lusas de Aveiro, Minho, Açores, Porto e a de Trás-os-Montes e Alto Douro. Ademais, aproveitando o encontro, mantivéronse reunións con representantes de empresas, clusters e outras institucións chegadas desde países como Marrocos, Eslovenia, Cabo Verde, Irlanda, Luxemburgo, ou Mozambique, co obxectivo de establecer novos contactos que amplien a rede do Campus do Mar e estudar posibles colaboracións en proxectos de toda índole.
O mar como reclamo
Foi precisamente unha mostra da riqueza e diversidade do mar condensada nos litros de auga dun acuario o que espertou máis interese entre os asistentes ao Forum do Mar. Montado polos técnicos da Estación de Ciencias Mariñas de Toralla, o acuario componse de xuvenís de sargos, misidáceos, camaróns e gobios así como vieiras, mexilóns, anémonas e todo tipo de flora e fauna mariña que atopamos nas costas galegas.O sábado ás 15.00 horas tivo lugar unha presentación do Campus do Mar a todos os visitantes do Fórum dentro do espazo 'Viver o Cluster'.