Póñense en marcha múltiples obras e un plan de control de acceso a edificios
O campus de Vigo reforza o proceso de mellora de infraestruturas
Máis alá das grandes obras que se están a levar a cabo no campus, das que Citexvi, o Módulo Tecnolóxico Industrial ou a Biblioteca de Ciencias Experimentais son bo exemplo, o Departamento técnico de obras, instalacións e infraestruturas está a realizar un importante número de actuacións dirixidas a reparar, modificar e ampliar as actuais instalacións. Algunhas das obras xa están case finalizadas, mentres que outras se levarán a cabo en xullo e agosto, aproveitando a menor afluencia de persoas aos centros.
Un dos eixes centrais destas actuacións é a renovación das pasarelas que unen diferentes edificios no campus, comezando pola que liga a Facultade de Ciencias Económicas e Empresariais coa Biblioteca Central, despois virán as que unen o salón de actos desta facultade coa biblioteca de Ciencias Xurídicas e do Traballo e a que relaciona directamente estes dous últimos edificios.
Outro dos puntos clave son as obras para a mellora e cambio da rede de saneamento do campus. Neste momento está practicamente rematado o cambio das canalizacións que unen a Reitoría co Edificio de Xerencia-Servizos Centrais, así como as que conectan o Edificio Miralles e a Biblioteca Central.
Nova sinalización en todo o campus
Nun ámbito moi distinto e, en colaboración co Concello de Vigo, pintouse todo a estrada de circunvalación e estase a renovar toda a sinalización vertical. Algúns sinais desapareceran ou caeran debido a accidentes e outros non estaban en bo estado. “Era necesario recuperar e pór ao día toda esta sinaléctica”, indica Daniel de la Torre, comisionado do departamento.O mesmo acontece coa sinalización interior do campus, que tamén está en proceso de renovación, tanto no que a sinais de tráfico se refire como a direccionais, é dicir, aquelas que indican como chegar a cada un dos centros. “A sinalización actual fíxose no 2005 e agora estamos estudando como mellorala para facilitar desprazamentos dentro do campus”, explica de la Torre.
Plan de control de accesos a edificios
Antes do comezo do novo curso, a Universidade vai pór en marcha a segunda fase do plan de control de accesos a edificios. Trátase dun sistema que regulará a entrada nos centros de persoal autorizado fóra do horario lectivo, mediante a utilización dunha tarxeta universitaria.“Temos xa a infraestrutura, que se estableceu no que foi a primeira fase, e agora o que estamos facendo e deseñando o sistema técnico”, explica Daniel de la Torre. “A miña tarxeta permitirame, sempre e cando estea validada, entrar no meu centro pero non en calquera outro”, continúa.
Diversas pequenas obras
O período estival é tamén o elixido para realizar traballos de mantemento nas diferentes escolas e facultades. É o caso da restauración da ETS de Enxeñeiros Industriais, un dos centros que debido á súa antigüidade, presenta certas carencias, ou da ETSE de Telecomunicación, onde se vai reparar a terraza da entrada, debido ás humidades que provoca na biblioteca e onde se acaba de rematar unha obra de remodelación de espazos dirixida a adaptar antigas aulas para despachos de profesorado.Ademais dos edificios, o campus conta con outros espazos nos que tamén se vai actuar. A ampliación da pista de footing e a recuperación das sendas do campus, bastante danadas polos temporais, son dous exemplos que sinala o comisinado “das múltiples pequenas cousas que se van realizar”.