DUVI

Diario da Universidade de Vigo

Só tres prestixiosos economistas españois foron nomeados pola SAET Economic Theory Fellow

Carlos Hervés entra nun selecto club de economistas do que forman parte varios Nobel

Valoraron "o seu elevado compromiso ético e as súas innovadoras contribucións académicas”

Etiquetas
  • Vigo
  • Investigación
D. Besadío DUVI 07/10/2011
O catedrático da Universidade de Vigo Carlos Hervés Beloso (Marín, 1953) foi nomeado Economic Theory Fellow, unha distinción coa que pasa a formar parte dun selecto club ao que só acceden economistas e matemáticos do máis alto nivel, incluíndo varios Premios Nobel (Edward C. Prescott, Kenneth Arrow, Robert J. Aumann, Eric S. Maskin…). Seleccionados pola prestixiosa Society for de Advancement of Economic Theory, SAET, pola súa “excelencia, orixinalidade e liderado; o seu elevado compromiso ético e as súas innovadoras contribucións académicas”, a condición esencial para optar a esta distinción “é ter realizado achegas substanciais á teoría económica”.

“Sinto que é unha honra non merecida”, subliña o profesor vigués, que destaca a importancia do nomeamento desde o punto de vista colectivo da Facultade de Ciencias Económicas e Empresariais e da propia Universidade, “pois internacionalmente ponnos nun lugar no que todos quixeran estar”, engade, ao tempo que subliña o bo nivel do centro, “algo que pode comprobarse facilmente botándolle unha ollada a produción científica dos seus docentes e investigadores e lembrando que os tres grupos de Economía que contan co selo de Excelencia da Xunta de Galicia teñen sede na facultade”, apunta en referencia aos grupos de investigación RGEA, que el mesmo dirixe, ERENEA e REDE.

Só tres representantes españois

Hervés comparte distinción con 156 expertos de institucións como Harvard, Yale, Princeton, Standford... unha lista da que tamén forma parte o Doutor Honoris Causa da Universidade de Vigo, Timothy Kehoe, profesor da Universidade de Minnesota. Sen embargo, son só dous os outros representantes procedentes de institucións españolas “dous pesos pesados da economía a nivel mundial”, subliña Hervés, para referirse aos outros dous Fellows españois: Andreu Mas-Colell e Salvador Barberá.

Mas-Colell é o actual responsable da carteira de Economía da Generalitat de Catalunya. Foi a persoa elixida por Artur Mas para dirixir as finanzas de Generalitat nun intre complicado. Catedrático de Economía da Universidade Pompeu Fabra e presidente da Barcelona Graduate School of Ecnomics, Mas-Colell, de 66 anos, doi durante anos director do Departamento de Economía da Universidade de Harvard .

Tamén Salvador Barberá conta con experiencia na xestión da política científica, asumindo postos como o de secretario xeral de Política Científica do Ministerio de Educación e Ciencia desde 2004 a 2006. Catedrático de Economía pola Universidade Autónoma de Barcelona, Salvador Barberá conta con algunhas das máis relevantes distincións en investigación.

Un matemático con vocación económica

Carlos Hervés é catedrático de Análise Matemático dende o ano 1989. Docente dende 1975 fixo a súa tese de doutoramento na cidade francesa de Nancy –sede do grupo de investigación Bourbaki, un dos mitos máis fortes das matemáticas do século XX- e o seu primeiro contrato asinouno no Trinity Collegue de Dublín, pero a morriña pola familia e a súa terra trouxo de novo a Vigo, onde iniciou os seus contactos co mundo da economía. “No 1985 dirixín a tese de Manuel Besada, centrada xa no ámbito económico e, a partir de aí, xa só me centrei neste campo”, explica o profesor.

No 1989, convidado por Andreu Mas-Colell, fai unha estancia no Departamento de Economía da Universidade de Harvard. “A partir de entón centro a miña actividade nos estudos de Teoría Económica e, na actualidade, o 80% do meu tempo dedícoo a escribir artigos desta disciplina”, subliña o catedrático, que conta con coautores en Estados Unidos, Portugal, Italia …

Na actualidade atópase inmerso, como presidente do Comité Científico, na organización do simposio anual da Asociación Española de Economía que se celebrará en Málaga no vindeiro mes de decembro.

SAET

A sociedade encargada de nomear os Fellows, SAET, ten a súa sede na Universidade de Illynois en Estados Unidos. Fundada polos prestixiosos investigadores Nicholas C Yannelis, Charalambos D. Aliprantis e o Premio Nobel de Economía Edward C. Prescott.

O obxectivo desta sociedade é avanzar no coñecemento en economía teórica e facilitar a comunicación entre os investigadores en economía, matemática, teoría dos xogos, ou calquera outro campo que é potencialmente útil para a teoría económica. Entre outras actividades, organizan un congreso bianual que se ten celebrado en diferentes lugares do mundo de xeito ininterrompido desde o 1993 e nel reúnen os mellores economistas académicos a nivel mundial.

O nomeamento como Fellow chegoulle durante a celebración do último congreso da asociación, celebrado en París no pasado mes de xuño e, entre outros aspectos, supón converterse en membro permanente do Consello Editorial da revista de Teoría Económica, o que me obriga “cando menos, a realización mensual de un ou varios informes para decidir si se admiten ou rexeitan os traballos que son enviados á revista”.