A convocatoria de axudas 2011-2012 terá como temática o futuro de Pontevedra
A Cátedra Filgueira Valverde financia sete investigacións que achegan as ciencias sociais ao mar
A comisión loubou o traballo de Manuel Fernández Areal, que deixa de ser membro honorífico da mesma
Sete proxectos de investigación do campus de Pontevedra relacionados coa gobernanza, co turismo, coa cultura ou coa educación lograron o financiamento da convocatoria de estudos de investigación da Cátedra Filgueira Valverde 2010 para poder afondar no estudo do mar dende a perspectiva das ciencias sociais. O número de propostas recibidas, ademais de amosar o compromiso dos investigadores co Campus do Mar, “manifesta que hai interese por traballar coa cátedra, o que a converte nunha vía de transferencia de coñecemento á sociedade”, comentou a vicerreitora Antonia Blanco na presentación do programa de actividades 2011/2012 da cátedra.
Estas bolsas, que naceron en 1997 para fomentar a investigación no campus, repartiron un total de 24.000 mil euros entre sete grupos de investigación de diferenciada temática na convocatoria de 2010. O traballo mellor valorado pola comisión foi o do profesor Xosé Mahou, que acadou un financiamento de 5000 euros para estudar a gobernanza do mar. En segundo termo, o proxecto A planificación e execución dunha campaña de promoción turística para a cidade de Pontevedra, vila entre o mar e o río, de Ana Belén Fernández Souto, conseguiu unha axuda de 4000 euros. As outras cinco liñas de investigación, Creación e Investigación do mar como elemento de identidade cultural, de Juan Carlos Meana; o estudo do proxecto Pescanatur, de Xulio Pardellas; Pontevedra e o mar, adquisición de competencias científico-educativas, psicosociais e culturais, de Mercedes Álvarez; A transformación de residuo a recurso, de Purificación Miramontes e Da diversidade mariña á enxeñaría de tecidos, de Paulino Pérez, foron recoñecidas con 3000 euros cada unha.
Para a vicerreitora e para José Zarza, director de Relacións Institucionais de Novacaixagalicia en Pontevedra , a boa acollida das actividades do ano anterior “é sinónimo de que a cátedra está consolidada, o que non implica relaxación, senón continuar traballando máis arreo para que Pontevedra se sinta orgullosa de ter esta liña de investigación e de cultura”.
Na procura de solucións para o futuro pontevedrés
No acto de presentación, a comisión de seguimento da cátedra tamén fixo pública a temática para a nova convocatoria de axudas de investigación para o 2011, titulada Pontevedra, a súa identidade e o seu futuro, o que supón “un gran reto para os investigadores desta Universidade, animándoos a analizar, unha vez que se saia da crise, en que posición vai estar a cidade dende o punto de vista social, económico e cultural e buscar algunha solución”, sinalou Antonio Gómez, membro honorífico da comisión. Lembrou ademais que todos estes estudos, unha vez finalizados, se editan nunha publicación “á disposición de toda a cidadanía”.Recordo á figura de Cástor San Pedro Folgar
Carlos Valle, director do Museo de Pontevedra e membro da comisión, tamén presentou o oitavo Memorial Filgueira Valverde, “outro dos ámbitos de promoción da cátedra”, dedicado aos aspectos de peregrinación e de culto a Santiago Apóstolo. Mentres que o noveno memorial, a piques de saír á luz, se centrou no retablo de Belvís, “a nova edición lembrará a figura de Cástor San Pedro Folgar, primeiro director do Museo de Pontevedra e unha das mentes máis significativas da intelectualidade galega de principios do século XX”.Os membros da comisión de seguimento quixeron aproveitar este acto público e a presenza de Fernando Filgueira, presidente da fundación Filgueira Valverde, para homenaxear ao catedrático Manuel Fernández Areal, un dos fundadores da cátedra e primeiro decano da Facultade de Ciencias Sociais e da Comunicación, con motivo do seu cese como membro honorífico. “Toda a comisión quere agradecer o traballo e o esforzo que dedicou sempre a esta cátedra, conseguindo que o labor desta Universidade calase entre a sociedade pontevedresa”, salientou a vicerreitora.