O xurado tamén recoñece o traballo do grupo de Química Coloidal da Universidade de Vigo
O catedrático Luis Liz Marzán, premio de Investigación Burdinola
Pola aplicación dos estudos sobre nanopartículas metálicas plasmónicas en novas terapias
Novo galardón ao bo facer do grupo de Química Coloidal da Universidade de Vigo e, en especial, ao seu director, o doutor Luis Liz Marzán. O catedrático acaba de ser distinguido co XVI Premio de Investigación Burdinola que, cunha dotación económica de 24000 euros, nesta edición quixo recoñecer o traballo sobre nanopartículas metálicas plasmónicas e a súa aplicación na diagnose e na aparición de novas liñas terapéuticas para distintas enfermidades que desenvolve o grupo de investigación vigués. “Foi unha sorpresa moi agradable, porque os outros candidatos eran grupos moi relevantes neste ámbito en España”, recoñece Liz Marzán, para quen o galardón ratifica “todos os recoñecementos que estamos a recibir nos últimos anos. Despois de tanto tempo traballando non fai falta que nos animen, pero da forza recibir recoñecementos que se saen do común e que abren novas expectativas. Anima a seguir mellorando”.
Posto en marcha no ano 1994 para contribuír ao recoñecemento, valoración e estímulo da comunidade científica, os premios Burdinola elixen cada ano unha temática distinta para ir galardoando investigacións de distintos ámbitos. Nesta edición, centrados na Biomedicina: aplicacións da nanotecnoloxía na diagnose e terapia clínica, o traballo de Liz Marzán e o grupo de Química Coloidal encaixaba como anel ao dedo. Iso considerou o xurado, que escolleu a candidatura viguesa polo seu traballo principalmente con partículas de ouro e prata, cunhas interesantes propiedades ópticas en tamaños reducidos, e polos resultados obtidos, que ofrecen novas posibilidades para o almacenamento de información ou para aplicacións relacionadas co medio ambiente.
Con preto de 30 investigadores, o grupo de Química Coloidal está formado maioritariamente por químicos, pero nel tamén traballan físicos e enxeñeiros. Formado en 1995, non foi ata o novo milenio cando comezaron a despuntar e a crecer “grazas a un traballo de calidade e a conseguir proxectos europeos”, subliña o seu director dun equipo que participa en distintas investigacións interdisciplinares con outros grupos. A consecución dunha prestixiosa Advanced Grant do Consello Europeo de Investigación, a primeira en Galicia e valorada en 2,3 millóns de euros, lles permitirá aplicar todo o traballo desenvolvido ata o de agora con bacterias e cultivos celulares para xerar a longo prazo novos tratamentos contra enfermidades.