Nesta edición promocionaranse actividades pouco coñecidas entre a sociedade
Caza, pesca, xadrez, futbolín e bridge protagonizan as V Xornadas da Comunicación e do Deporte
Varios expertos serán os encargados de impartir doce relatorios entre o 24 e o 25 de outubro
Porque hai oportunidades laborais máis aló da organización de eventos para fútbol, baloncesto, fórmula 1 ou motociclismo, a quinta edición das Xornadas da Comunicación e do Deporte centrarase este ano na promoción de aqueles “deportes que non son deportes”. Durante o 24 e 25 de outubro, o alumnado do campus de Pontevedra coñecerá da man de profesionais do sector, de asociacións e federacións “as principais claves para xestionar e organizar actividades deportivas que moita xente non considera como tal, caso do futbolín, caza, pesca ou bridge”, explica Ana Belén Fernández Souto, directora da Área de Extensión Cultural, Deportes e Comunicación do campus e coordinadora das xornadas.
Nesta nova edición, as xornadas comprométense coa difusión de actividades reservadas a un público minoritario e especializado. Como aclara Fernández Souto, “son prácticas deportivas que non gozan do recoñecemento social e da repercusión de outras, aínda que se promovan internacionalmente”. Por esta razón sinala que é necesario demostrar que hai máis posibilidades deportivas e comunicativas que as típicas prácticas, “converténdose en posibles clientes que ás veces nin se atenden nin se contemplan e que teñen as súas necesidades comunicativas coa organización de eventos ou coa procura de patrocinadores”.
Como xestionar a caza do zorro
As xornadas serán inauguradas por representantes do Comité Olímpico Español e do Consello Superior de Deportes que explicarán a normativa española, afondando no que se considera ou non deporte. “Explicarán os criterios que empregan para definir o que é un deporte olímpico, destacando porque o xadrez ou o bridge reciben ese calificativo e o parchís, por exemplo, non”, puntualiza a directora das xornadas. Entrarase en materia coa caza, “segundo deporte en España que conta con máis licencias deportivas tras o fútbol”, da man da Federación Galega de Caza, a que achegará as principais claves e técnicas para xestionar un evento como a captura do zorro. “Dende o punto de vista comunicacional facer fronte a un evento destas características supón un gran reto para o profesional pois sempre terá que saír ao paso das protestas das protectoras de animais”, exemplifica Fernández Souto.A pesca tamén será tema de debate da man de Rafael Nogues, membro do comité organizador do Open Internacional de Corcheo de Mar, que explicará as especificidades do evento e a súa repercusión en revistas especializadas. Os alpinistas Andrés Fraga e Juan Rivas tamén participarán nas xornadas para falar da promoción online do proxecto 6 mil pasos que eles mesmos protagonizaron, redactando a través de blogs e das redes sociais as súas vivencias á hora de realizar o Camiño de Santiago dende o norte de Europa. Os beneficios das redes sociais para a organización de campionatos de xadrez a nivel internacional; o caso de empresas emprendedoras que axudan na promoción de pequenas federacións; o parque de atraccións Pena Aventura Park de Chaves como exemplo de posicionamento para un produto novo e sostible e as principais estratexias de comunicación na organización de eventos do futbolín e do bridge, completan o programa desta nova edición.
A visión do patrocinador e do patrocinado
Como en anos anteriores, o fenómeno do patrocinio terá unha atención especial, “ofrecendo desta vez o punto de vista do patrocinador e do patrocinado”, puntualiza a directora das xornadas. Así, a segunda xornada comezará coa conferencia de Miguel Bados, de ASDE SL, empresa especializada na organización de eventos deportivos. Bados “ofrecerá unha visión do panorama actual do negocio do patrocinio e das marcas”, centrándose especialmente nas novas estratexias deseñadas para facer fronte á crise económica. Como contrapunto, tamén intervirá Miguel Churruca, responsable do departamento de marketing de Blusens, que “dará o outro punto de vista e explicará a política de patrocinio da marca en moto GP”, sinala Fernández Souto.A xornada inaugural comezará o vindeiro 24 de outubro ás 10.30 horas no salón de actos da Facultade de Ciencias Sociais e da Comunicación do campus de Pontevedra e a asistencia aos relatorios convalidarase cun crédito de libre configuración. A inscrición, de carácter gratuíto, farase cubrindo a ficha que se pode descargar da web do campus de Pontevedra e enviala a campuspontevedra@uvigo.es.