Cinco alumnos de Belas Artes amosan as súas obras na Casa da Xuventude de Vigo

As obras dos alumnos da Facultade de Belas Artes cada día traspasan novas fronteiras e, nesta ocasión, foron ata a Casa da Xuventude de Vigo onde, ata o vindeiro 15 de maio, pódese visitar a exposición colectiva Patio Interior que presentan cinco estudantes do campus pontevedrés. Nesta ocasión, o proxecto consiste nunha instalación multidisciplinar que resultou ser o froito das dificultades propias do espazo coas que moitas veces se atopan os artistas e que, en verbas dunha das estudantes que participan nesta iniciativa, Haya Blanco, “ao final resultaron ser a mesma solución á hora de unificar as distintas propostas”. Xunto a ela, Carolina Caluori, María Castellanos Vicente, Olalla Cortizas Varela e David Crespo Varela son os outros catro estudantes do último curso de Belas Artes e novos artistas que lograron facer dunha sala parte da súa mostra. Segundo explicou outra das creadoras, “Patio Interior é unha instalación multidisciplinar na que a arquitectura propia do lugar invitounos a desenvolver un proxecto específico para o traballo in situ”, comentou María Castellanos antes da inauguración da exposición.
Todos aqueles que se acheguen a botar unha ollada a este novedoso proxecto, atoparánse con todo tipo de disciplinas artísticas mesturadas nun mesmo traballo, xa que pintura, escultura, gravado, debuxo e fotografía conviven con harmonía nesta obra.

O problema das salas

O inicial problema de espazo co que se atoparon os creadores da exposición Patio Interior, é algo moito máis común do que se pode imaxinar, xa que na maioría das ocasións, a adecuación ás salas forma parte do propio proxecto á hora de amosar as obras ante os ollos do público. De feito, este é o tema central da materia de cuarto curso de Belas Artes, Extensión e repercusión das linguaxes artísticas, que imparte a profesora Silvia García e que pretende “que os rapaces teñan un achegamento ao mundo profesional e que vexan os problemas técnicos dunha sala e como os poden solucionar”, comentou a docente do campus pontevedrés. En moitas ocasións o inconveniente vai máis alá e os artistas teñen que modificar os seus traballos en función do lugar onde os van a expor, xa que en función do que queiran transmitir necesitarán un tipo de localización diferente, cores determinadas, espazos concretos, etc.