Cinema latinoamericano nun novo Ciclo de Estreas en Versión Orixinal

O Cineclube Padre Feijóo vén de pór en marcha un novo Ciclo de Estreas en Versión Orixinal dedicado esta vez ao cinema latinoamericano. O certame comezará o seu desenvolvemento este mércores, 3 de febreiro, coa proxección da película uruguaia Gigante, dirixida por Adrián Biniez e premiada nos festivais de Berlín e San Sebastián. O seguinte pase será o día 10 de febreiro coa proxección da película peruana La teta asustada, dirixida por Claudia Llosa e merecedora do Oso de Ouro no Festival de Berlín. O filme chileno La buena vida, dirixido por Andrés Wood, pechará a iniciativa o día 27 de febreiro. Entre outros galardóns esta película obtivo o Premio Goya 2009 ao mellor filme hispanoamericano.
Gigante é, xa que logo, o título da película que vai inaugurar este novo Ciclo de Estreas en Versión Orixinal. Trátase dun filme uruguaio dirixido por Adrián Biniez que conta a historia de Jara (Horacio Camandule), o garda de seguridade dun hipermercado que se enamora da rapaza da limpeza que traballa no mesmo establecemento. Nun primeiro momento conformarase con observala a través das cámaras de vixilancia pero moi pronto fará todo o posible para poder coñecela.

Películas de Perú e Chile completan o certame de estreas no Cinebox

A seguinte película programada con motivo do certame leva por título La teta asustada e proxectarase o día 10 de febreiro. Trátase dun filme peruano dirixido por Claudia Llosa que ten como protagonista a Fausta, unha moza que sofre a enfermidade da teta asustada, unha doenza que se transmite pola leite materna das mulleres que foron violadas ou maltratadas durante a guerra do terrorismo no Perú. A guerra acabou pero Fausta vive co medo dese pasado. A súbita morte da súa nai vaina obrigar a enfrontarse aos seus pesadelos.
La buena vida, un filme chileno dirixido por Andrés Wood, pechará o ciclo de proxeccións o día 27 de febreiro. O filme amosa a Teresa, Edmundo, Mario e Patricia, catro habitantes de Santiago de Chile que entrecruzan as súas vidas na voráxine da gran cidade e no medio de bocinazos, frenazos e alarmas de vehículos. Cada un destes personaxes persigue un sono: Teresa (Aline Kuppenheim) é unha psicóloga que trata de salvar vidas; Edmundo (Roberto Farías) é un perruqueiro que soña con ter un coche; Mario (Eduardo Paxeco) quere entrar na Filarmónica e Patricia (Paula Sotelo) sobrevive. Cada un deles anhela un desexo que parece inalcanzable. Ningún logra o seu obxectivo, pero si obterán un resultado inesperado.
Os pases terán lugar no Cinebox (Centro Comercial Ponte Vella) ás 20.30 e ás 23.00 horas. A entrada custa 4 euros, 3 euros no caso de estudantes con carné universitario. O certame está organizado polo Cineclube Padre Feijóo co apoio da Vicerreitoría do campus, a Concellería de Cultura do Concello de Ourense, a Federación de Cineclubes de Galicia e a Secretaría Xeral de Medios da Xunta de Galicia.