Diario da Universidade de Vigo
O Comité Universitario do Campus de Ourense nace para representar e expresar a opinión de todo o alumnado
A asociación organizará actividades culturais, deportivas e formativas
Jonathan Domínguez e María Álvarez, presidente e vicepresidenta da asociación, son os deseñadores dos logotipos. Este primeiro símbolo será o empregado na cartelería
O segundo logotipo será empregado para os actos formais da asociación
O campus conta cunha nova asociación de alumnos, o Comité Universitario do Campus de Ourense, CUCO, que naceu por iniciativa dun grupo de estudantes da Facultade de Dereito coa idea de crear “unha asociación diferente, próxima ao alumnado e que represente os intereses de todos”, explicou Jonathan Domínguez, presidente do comité. A través deste proxecto, CUCO tratará de levar a cabo actividades nos ámbitos cultural, deportivo e formativo, e ser a voz do estudantado no seo da comunidade universitaria.
Custou moito traballo poñer esta iniciativa en marcha, debido aos trámites burocráticos; ademais a data da súa constitución foi moi axustada para poder solicitar as subvencións para a realización das actividades. “Traballamos contrarreloxo durante estas semanas, pero estamos moi contentos, xa que CUCO é unha alternativa máis nun momento en que o asociacionismo universitario non está a pasar unha das súas mellores épocas”, dixo Domínguez.
Obxectivos e composición de CUCO
Os obxectivos desta asociación son expresar e representar a opinión do alumnado en todo aquilo que afecte á súa situación no campus, así como “asesoralo sobre os seus dereitos e deberes e fomentar a súa participación na vida universitaria”, engadiu Domínguez. Tamén entra dentro das súas intencións organizar actividades culturais, de lecer, deportivas e formativas e colaborar con outras entidades e asociacións buscando crear vínculos de comunicación e cooperación.CUCO está composta por un conxunto de estudantes de diversas especialidades universitarias que buscan “conseguir as súas metas a través do traballo en equipo, do esforzo diario e da responsabilidade nas súas tarefas”, comentou María Álvarez, vicepresidenta da asociación. Calquera persoa vinculada ao campus de Ourense, alumnos, PDI e PAS, pode entrar a formar parte da asociación. Os requisitos son aceptar a filosofía de traballo e respectar as normas internas. “Non existe ningún tipo de vinculación ideolóxica, sexa da índole que sexa, todos teñen un sitio”, precisou Domínguez.
Actividades e imaxe da asociación
As actividades que realizará a asociación abranguen tres ámbitos: o formativo, o cultural e de lecer e o deportivo. Dentro destes eidos organizará charlas, conferencias, cursos, xornadas informativas, torneos e outras actividades. A primeira das súas tarefas será prestar colaboración nas festas de Ourense coa coorganización do II Torneo de Futbolín Cidade de Ourense, que se celebrará o día 27 de xuño na praza da Estrela.Neste curso, que xa finaliza, será a única actividade que desenvolvan xa que o tardío da súa constitución, no mes de maio, non permite dispoñer de máis de tempo para a organización doutras actividades. Sen embargo, para o próximo curso “xa dispomos dunha programación que tentaremos pór en marcha desde o mes de setembro”, comentou Álvarez.
O comité conta cunha imaxe propia, que xoga coas iniciais da asociación e o que estas evocan. Son dous símbolos, un máis sobrio, para os actos formais, e outro de uso cotián e que figurará, sobre todo, na cartelaría. A idea orixinal de ambos xurdiu da cabeza de Álvarez, que deseñou os debuxos e coa axuda de Jonathan Domínguez perfilaron os resto de detalles.