A comunidade universitaria será homenaxeada cun partido de baloncesto no pavillón Paco Paz
O encontro terá lugar o vindeiro mércores ás nove da noite
Coa intención de seguir achegando o deporte á comunidade universitaria, todos os seus membros están invitados a asistir de balde ao partido de baloncesto que na súa homenaxe enfrontará o vindeiro mércores aos clubes Aguas de Sousas e o Basket Tarragona.
A cita terá lugar ás nove da noite no pavillón Paco Paz, onde habitualmente desputa os seus encontros o Clube Ourense Baloncesto, COB, encargado de organizar o evento en colaboración coa Universidade. “PDI, PAS, estudantes, decanos, representantes de asociacións de alumnos e o resto de membros da comunidade teñen as portas abertas”, tal como afirma María Lameiras, vicerreitora do campus de Ourense e encargada de presentar o acto. De feito, a única condición para entrar ao estadio é presentar o carné universitario.
O obxectivo desta iniciativa é “promocionar a actividade física como un elemento máis da formación intergral que a Universidade debe ofrecer, tanto ao alumnado como á sociedade en xeral”, segundo comenta Lameiras, que engade que “ao mesmo tempo tratamos de ofrecer unha alternativa de ocio saudable e beneficiosa para a xuventude”. Para isto, dende a súa vicerreitoría manteñen contactos con diversas asociacións deportivas da cidade, entre elas, o propio COB e o CB Feminino Pavillón Ourense. O campus dá, deste xeito, un novo paso na súa procura dun maior contacto coa cidade e cos seus habitantes que, por suposto, tamén poden acudir ao encontro.