O Concello de Ferrol estreita lazos co Campus do Mar

Xa en maio de 2010, o Concello de Ferrol amosou o seu compromiso e adhesión ao proxecto do Campus do Mar. Agora, e tras as eleccións municipais, o novo rexedor José Manuel Rey continúa con esta senda de colaboración que se escenificou este luns nunha visita á Estación de Bioloxía Mariña da Graña, dependente da Universidade de Santiago de Compostela. Da man de Emilio Fernández, director do Campus do Mar, de Luis Fernández, director da Área de Transferencia do Campus do Mar e de Victoriano Urgorri, director da Área de Proxección Social e Cultura Científica e Tecnolóxica do Campus do Mar e director da estación, o alcalde puido achegarse a esta iniciativa que valorou moi positivamente. Rey fixo público o “compromiso do Concello de Ferrol para colaborar de xeito activo tanto coa Estación de Bioloxía Mariña como coas tres universidades que arestora participan no programa Campus do Mar”.

Colaboración en proxectos conxuntos

Nesta xuntanza cos tres membros do equipo de dirección do Campus de Excelencia, foille presentado ao alcalde o proxecto incidindo en que sendo Ferrol unha comarca tan fondamente vencellada ao mar, o Campus do Mar ofrécelle ao Concello a realización de accións potenciais conxuntas e o asesoramento en tódalas temáticas mariñas e marítimas, amais da organización de actividades formativas e divulgativas, a definición de programas de prácticas pre-profesionais, a colaboración nos programas de captación de talento, etc.

Na visita ás instalacións á estación científica, o alcalde estivo acompañado polo director, Victoriano Urgorri, pola subdirectora do centro, Celia Besteiro, e polo xefe e subxefe da EBMG-USC, Guillermo Díaz Agras e Alexandre García Regueira. No percorrido por este centro singular dentro do Campus do Mar, o rexedor ferrolán interesouse polas investigacións que a Estación de Bioloxía Mariña da Graña está a realizar na Ría de Ferrol; así mesmo, amosou a súa preocupación polo estado da calidade ambiental das augas da ría.

Deste xeito o novo alcalde da cidade departamental puido coñecer tanto os laboratorios e as dependencias do centro como traballo de investigación que neles desenvolvese, así como analizar e avaliar de forma conxunta accións de cooperación ao abeiro do Campus do Mar.