Diario da Universidade de Vigo
O Campus ConVida organizará os vindeiros meses obradoiros, postos informativos e campañas promociona
Un cuadrimestre do máis saudable
O proxecto consolida a súa programación despois do éxito da experiencia piloto do curso pasado
A nova programación do Campus ConVida foi presentada por Reyes Pérez, José María Faílde, Alberto Vaquero, María Lameiras, Rodrigo Pivida, Julia de la Montaña e Antonio Carracedo
O proxecto consolida a súa programación con dous obradoiros, novos Martes ConVida, unha campaña promocional e a participación do Centro de Trasfusión de Sangue de Galicia
O curso pasado o campus de Ourense marcouse como un dos seus obxectivos estratéxicos ter unha comunidade universitaria o máis saudable posible desde o punto de vista físico, psíquico e social. Para acadalo, puxo en marcha o proxecto Campus ConVida que, pasada a súa etapa piloto, contará este cuadrimestre cunha intensa programación que inclúe obradoiros, postos informativos e campañas promocionais. Ter unha vida sa, explican os promotores da iniciativa, é moito máis que non ter enfermidades, é tamén traballar por mellorar o noso benestar e o da nosa contorna.
María Lameiras, vicerreitora do campus de Ourense; Alberte Rodrigo Pivida, responsable do Servizo de Deportes do campus; os docentes Reyes Pérez, José María Faílde e Julia de la Montaña, e Antonio Carracedo, coordinador do Centro de Transfusión de Galicia, foron os encargados de presentar a programación que se desenvolverá os vindeiros meses no marco deste proxecto, que conta con financiamento do Consello Social da Universidade de Vigo. “O noso obxectivo é ter unha comunidade máis sa no eido biopsicosocial. Para conseguilo traballamos con accións puntuais, organizadas no marco do proxecto Campus ConVida e aproveitando os profesionais e os servizos do noso campus, e cunha perspectiva transversal, intentando coidar este enfoque en todas as nosas actividades, sexan do tipo que sexan”, destacou María Lameiras durante a presentación da programación.
Volven os Martes ConVida con novidades
Durante este segundo cuadrimestre, concretamente nos meses de marzo e abril, cada un dos edificios do campus de Ourense e o Centro Penitenciario de Pereiro de Aguiar acollerán durante un día a celebración dunha nova edición dos Martes ConVida. “Esta actividade consiste na instalación dunhas carpas con puntos de atención sobre saúde, sobre nutrición e sobre sexualidade”, explicou Alberte Rodrigo Pivida. Entre as novidades desta xeira estará a posibilidade de que os fumadores poidan analizar a súa capacidade pulmonar e que os asistentes en xeral coñezan o seu grupo sanguíneo e poidan doar sangue.“Na primeira fase da campaña de doazón de sangue realizada na universidade notamos un descenso do 15%. Con esta nova iniciativa a idea é darlle ás persoas interesadas información sobre o seu grupo sanguíneo, sobre a súa importancia no conxunto das doazóns e ofrecerlles tamén a posibilidade de doar sangue xa no momento”, explicou o coordinador do Centro de Transfusión de Galicia. O obxectivo é que en cada Martes ConVida 50 persoas poidan doar sangue e recuperar así as cifras de solidariedade doutros anos no eido universitario.
Cociña e mediación
A programación do segundo cuadrimestre tamén inclúe a celebración de dous obradoiros. O primeiro deles leva por título Cociña Saudable e será impartido polos cociñeiros Daniel Guzmán e Julio Sotomayor no Restaurante Nova de Ourense. “Os participante elaborarán menús saudables, fáciles e económicos co obxectivo de mellorar a súa dieta”, destacou Julia de la Montaña. Segundo explicou a docente, nas actividades realizadas ata o momento do Campus ConVida detectaron que o alumnado xa ía adquirindo coñecementos sobre as necesidades dunha dieta saudable pero que lles faltaba formación práctica, polo que decidiron pór en marcha esta nova acción.O segundo dos talleres, coordinador por José María Faílde e Reyes Pérez, leva por título Obradoiro de Mediadores na Promoción e a Educación para a Saúde. Recoñecido polo Sergas con 4,5 créditos e de interese sanitario, o obxectivo destas actividade é capacitar aos asistentes en estratexias e habilidades para a saúde, abordando aspectos como a sexualidade, a prevención de adicións e a promoción de hábitos de vida beneficiosos.