Un curso ensinará aos docentes as vantaxes de utilizar as novas tecnoloxías no ensino

Hot Potatoes é unha ferramenta que permite crear exercicios interactivos e publicalos na rede. Este programa ofrece grandes vantaxes a colectivos como o do profesorado xa que lles permite aos seus alumnos e alumnas utilizalo a través de Internet para facer unha autoavaliación sobre os contidos da materia, entre outras utilidades. Os docentes das distintas áreas do campus teñen agora a posibilidade de aprender a utilizar esta ferramenta nun curso de formación do profesorado que se desenvolverá durante os días 16 a 23 de xuño impartido pola profesora María Victoria Fernández. O prazo de matrícula para participar nesta actividade remata o día 14 de xuño.
Explica a docente que as novas tecnoloxías ofrécenlle ao profesorado “moitas posibilidades das que careciamos ata fai non moito tempo” e defende a súa utilización “sempre que o seu uso estea ben fundamentado e nos faciliten e melloren o noso traballo na aula”. Nesta contorna sitúase a ferramenta Hot Potatoes que lles vai permitir aos docentes que asistan ao curso aprender a confeccionar diferentes tipos de exercicios interactivos como por exemplo encrucillados que se colgarían na rede coa posibilidade de engadirlles outros recursos como lecturas, imaxes, vídeo ou táboas. Desta maneira e segundo explica María Victoria Fernández “o estudante poderá acceder a eles dende calquera ordenador e sen necesidade de ter instalado o programa”.

Contido do curso

O curso comezará facendo un percorrido polas características básicas do programa Hot Potatoes para pasar, de seguido, a elaborar algúns exercicios e a crear unha páxina web. Os asistentes ao seminario aprenderán tamén a facer diferentes tipos de exercicios como os de selección múltiple, resposta curta ou os de emparellamentos e tamén a crear unidades didácticas. As clases rematarán coa publicación de todos estes contidos na web para poder lanzalos á rede e polos así a disposición dos seus estudantes.