A Deputación de Ourense concede a medalla de ouro da provincia a Luís Rodríguez Míguez

A Deputación de Ourense aprobou este venres nun pleno ordinario a concesión a Luís Rodríguez Míguez da medalla de ouro da provincia de Ourense a título póstumo. Este recoñecemento, indican desde a entidade, faise “pola súa contribución a realzar e relanzar a maior singularidade que ten Ourense, a súa riqueza termal posto que o foi todo no termalismo da nosa provincia”.

Luís Rodríguez Míguez, médico, profesor universitario e escritor, naceu en Santiago de Compostela en 1932 e faleceu en Ourense en febreiro deste ano, logo dunha prolífica traxectoria profesional nos ámbitos da saúde e do termalismo. Licenciado en Medicina e Cirurxía pola Universidade de Santiago, traballou como profesor nas universidades de Santiago e Vigo, foi director do Centro de Sanidade Ambiental de Santiago, xefe provincial de Sanidade de Ourense, director de Saúde da Delegación Territorial de Ourense e director xeral de Saúde Pública, ademais de profesor no Departamento de Bioloxía Funcional e Ciencias da Saúde da Facultade de Ciencias do campus de Ourense.

Académico da Real Academia de Medicina, entre os traballos que publicou figuran El termalismo en Galicia en la década de los ochenta (1988); Estudio histórico bibliográfico del termalismo: principales surgencias de la provincia de Ourense (1995), e numerosos artigos en prensa e revistas especializadas, ademais de relatorios en congresos e seminarios estatais e internacionais. No ano 2004, ante a súa xubilación, a Facultade de Ciencias do campus de Ourense decidiu concederlle a súa primeira e única medalla de ouro.