Dirección e Xestión Pública busca atraer alumnado de toda España coa súa modalidade semipresencial

Persoal das diferentes administracións, xestores de empresas, responsables de loxística ou de compras de organizacións que traballan para as institucións públicas.... Son variados os perfís laborais aos que o grao en Dirección e Xestión Pública achegaría uns coñecementos moi útiles para o seu desenvolvemento como profesionais. Por iso, co obxectivo de ampliar a súas posibilidades formativas, esta titulación da Facultade de Ciencias Sociais e da Comunicación contará a partir do vindeiro curso cunha modalidade semipresencial, que lles permitirá recibir por Internet a mesma formación que se proporciona nas aulas. Con esta medida, os responsables desta titulación buscan tamén “ampliar o rango de posibles alumnos a todo o territorio da autonomía e mesmo de fóra de Galicia”, como sostén o coordinador do grao, Enrique Varela, que este xoves compareceu xunto ao decano en funcións de Ciencias Sociais e da Comunicación, Celso Cancela, para presentar o que definiron como “unha nova oportunidade formativa”.

O mesmo sistema de aprendizaxe, pero virtual

Foi a raíz das solicitudes que lles fixeron chegar “potenciais alumnos, que non podían cursar este grao principalmente por motivos laborais”, que os responsables desta titulación comezaron a traballar na que será unha “modalidade única no campus de Pontevedra”, como destacou Cancela. Unha modalidade que, como matizou Varela, "non será a prima pobre da modalidade presencial”, coa que convivirá, senón que implicará “as mesmas garantías académicas e xurídicas de avaliación de competencias" que o grao actual. “Son os mesmos contidos, os mesmos profesores, o mesmo desenvolvemento de competencias, o único que varía son as probas de seguimento e avaliación”, explica o coordinador do grao.

Mais isto non significa que o alumnado se forme pola súa conta e acuda a un exame final. Todo o contrario, o que se lle ofrece con esta modalidade é un xeito alternativo de someterse ás diferentes probas que se realizan nesta titulación ao longo do cuadrimestre para medir o grao de adquisición de competencias. Farase a través dunha plataforma virtual en Internet, que se complementará coa utilización de foros e videoconferencias, ás que se suma tamén a posibilidade de acudir a determinadas sesións na facultade, programadas especificamente para os matriculados nesta modalidade. “A clave é acompañar ao alumno en todo momento”, apuntou Varela, que destacou a implicación do profesorado cunha opción que “vai ser igual de esixente academicamente”.

Un grao único que pode interesar en múltiples partes de España

A implantación na Facultade de Ciencias Sociais do máster online en Dirección Pública e Liderado Institucional permitiu ao profesorado do centro adquirir unha valiosa experiencia de cara ao paso que dará Dirección e Xestión Pública o vindeiro curso. Mais, como recoñeceu Varela, “o éxito” desta titulación tamén serviu aos responsables do grao para incidir na posibilidade de que a semipresencialidade “permita posicionar á titulación e á Universidade tanto dentro como fóra de Galicia”. Como relatou Cancela, o máster conta con alumnado de varios países de América Latina e de diferentes partes de España. Por iso, o feito de que a titulación que se imparte no campus sexa “o único grao en Dirección e Xestión Pública de España” e a “vantaxe competitiva que supón que Galicia conte coas taxas universitarias máis baixas”, fan prever aos seus responsables que esta nova alternativa podería atraer a estudantes de calquera parte do Estado.

Unha titulación pouco coñecida

Co obxectivo de coñecer o interese que podía espertar a semipresencialidade entre aqueles perfís profesionais máis relacionados cos contidos desta titulación, os responsables do grao realizaron no mes de maio unha enquisa entre o persoal de administracións públicas e entidades educativas de diferentes puntos de Galicia, no que o 83% dos participantes sinalaron que preferían unha modalidade non presencial. Mais, como explicou Cancela, esta enquisa tamén permitiu coñecer que, a pesares de que Dirección e Xestión Pública “foi a segunda titulación mellor valorada da Universidade” no curso 2012-2013, trátase dun “produto formativo pouco coñecido”. A este respecto, o decano en funcións explicou que o 75% das persoas enquisadas non coñecía o grao e apenas o 10% sabía da posibilidade de obter a dobre titulación polas universidades de Vigo e Sao Paulo, grazas ao convenio subscrito entre ambas institucións.