Diario da Universidade de Vigo
O ex reitor afirma que o seu traballo “ten máis que ver con imprimir unha marca de independencia”
Domingo Docampo nomeado presidente do consello de administración de Xornal de Galicia
O medio verá a luz o vindeiro 9 de decembro
Domingo Docampo será o presidente do consello de administración de Xornal de Galicia S.A, despois que a xunta de accionistas do medio, que verá a luz o vindeiro 9 de decembro, acordase o seu nomeamento. “É un traballo de fondo e non acotío que podo compatibilizar coas actividades que desenvolvo na actualidade”, asegura Docampo que afirma que o seu desempeño á fronte do consello de administración “ten máis que ver con imprimir unha marca de independencia que non cun número de horas”.
O ex reitor da Universidade de Vigo presidirá un consello de administración do que tamén forman parte Ramón Barral como vicepresidente económico; o ex vicerreitor da Universidade de Vigo Xavier Martínez Cobas, como conselleiro delegado; José Piay, Ceferino Díaz, Fernando Filgueira, Manuel Gallego Jorreto, Victorino Núñez, Javier Rey e José Luís Gómez que é tamén o director de Xornal de Galicia. Pola súa banda a letrada Paloma Vázquez, será a secretaria do consello de administración.
Este non será o primeiro contacto que Docampo terá co mundo xornalístico xa que “colaborei escribindo para algún medio”, lembra, aínda que agora “trátase dunha oportunidade distinta nun mundo do que non formei parte e que considero certamente interesante”.
O novo diario que abarcará toda Galicia, con especial atención ás áreas metropolitanas, nace con versións impresa e dixital. Xornal de Galicia pertence a Udramedios, filial do Grupo San José que integra as súas participacións en diversos medios de comunicación. Sobre o novo medio o ex reitor da Universidade de Vigo apunta que “este proxecto no que participan algúns amigos e no que se me convidou a tomar parte, aspira a encher un baleiro que consideramos existe neste momento no panorama xornalístico. Espero que sexamos quen de logralo”.