No campionato internacional “Galicia Chess Festival” que se disputou esta fin de semana
Dous xogadores do equipo de xadrez da Universidade, entre os 16 mellores do mundo
Manuel Pena e Rafael Rodríguez son xunto a Iván Salgado os únicos galegos da clasificación
O xadrez marcou a axenda deportiva desta fin de semana den Ourense, xa que os mellores xogadores nacionais e internacionais desta disciplina concentráronse na cidade para disputar o “Galicia Chess Festival 09”. A celebración deste evento foi de gran relevancia para este deporte, “amosa o apoio das institucións galegas ao xadrez”, comenta Pablo García Castro, un dos organizadores do torneo e capitán do equipo da Universidade de Vigo. O acto de clausura do festival contou coa presenza do presidente da Xunta de Galicia, Alberto Núñez Feijóo, quen destacou “a importancia do xadrez como un deporte onde a capacidade de decidir en poucos instantes é imprescindible". Ademais, Núñez Feijóo comentou que mellorará a aposta por este deporte, “introducíndoo no sistema educativo e no ámbito da saúde, no traballo cos maiores para exercitar a memoria e nos casos con Alzheimer”. Neste sentido, “ademais da importancia deportiva, ábrense dous campos novos nos que xa estaba traballando a Universidade”.
Este festival non só foi o evento máis importante que se fixo na historia de Galicia, “senón un dos máis relevantes do mundo respecto ao montante dos premios nesta categoría de xadrez lóstrego”.
O torneo Aberto Internacional de Rápidas Memorial Fernando Marcote foi a competición central, disputándose dende o venres e ata o sábado. O peruano Julio Granda alzouse coa vitoria deste torneo nos play off do domingo, tras enfrontarse na final contra o bielorruso Aleksej Aleksandrov. Destaca nesta competición a presenza dos galegos Iván Salgado, único Gran Mestre de Galicia e número dous a nivel nacional, e Manuel Pena e Rafael Rodríguez, pertencentes ao equipo de xadrez da Universidade de Vigo. Ambos os tres conseguiron chegar ata oitavos, quedando finalmente nos postos 12, 14 e 15 respectivamente. Nunha destas roldas clasificatorias, o propio Pena tivo que enfrontarse con Salgado, nunha partida na que Núñez Feijóo realizou o saque de honra que deu comezo ao xogo. Castro comenta orgulloso o bo papel dos xogadores da Universidade, “ambos tiveron unha actuación moi destacada, os dous foron quen de vencer a Granda e clasificáronse para os play off, dos que moitos mestres quedaron fóra e iso é algo, por si só, extraordinario”.
No tocante á participación feminina, destaca o triunfo de Graciela Redondo, vencedora nesta categoría do Aberto Internacional de Rápidas Memorial Fernando Marcote, tras impoñerse por riba de Elena Sedina e Claudia Robles, acadando así o primeiro premio dotado con 3000 euros.
Aberto Internacional de Blitz
A outra competición do fin de semana, que se disputou no medio do Memorial Fernando Marcote, foi o Aberto Internacional de Blitz Xacobeo 2010, no cal Vugar Gashimov, o número 14 do mundo, fíxose co triunfo con 9,5 puntos tras ceder táboas na décima e última rolda sabéndose xa gañador. Yuri Drozdovskij e Loek Van Wely completan o podio con 7,5 puntos, empatados con outros sete xogadores, entre eles o primeiro galego, Daniel Táboas, oitavo clasificado. Neste torneo de xadrez lóstrego destacou tamén á participación de Javier Marcote, director de la Escuela Internacional Kasparov-Marcote e fillo de Fernando Marcote.No tocante á participación feminina, o triunfo foi para a italiana Elena Sedina con 6,5 puntos, seguida de Claudia Robles e Karen Zapata.