Diario da Universidade de Vigo
A ANL pon en marcha a campaña 'O galego, o noso medio natural'
Ecoloxía e lingua mestúranse para evitar a desaparición do galego
De dereita a esqueda, Xosé Henrique Costas, vicerreitor de Extensión Universitaria; Valentina Formoso, coordinadora da CGDNL; e Serafín Martínez, ciclista.
Repartiranse máis de 4.000 ecoguías, ademáis de camisolas, adhesivos, petates ou chapas.
Os datos non deixan moito marxe para a esperanza: 47 especies de flora e fauna desaparecen cada día dos nosos ecosistemas. Aínda que poida parecer incrible, o mesmo ocorre coas linguas: cada ano entre 25 e 30 idiomas deixan de escoitarse no mundo. Entre eles pode que o noso idioma. Para loitar pola supervivencia do galego, a Área de Normalización Lingüística de Universida de Vigo (ANL), en colaboración coa Coordinadora Galega de Equipos de Normalización e Dinamización Lingüística (CGDNL), acaban de pór en marcha a campaña O galego, o noso medio natural, que presentou Xosé Henrique Costas, vicerreitor de Extensión Universitaria. O seu protagonista principal é a ecoguía: máis de 4000 cadernos que se repartirán nos campus e nos centros de ensinanza non universitaria públicos e concertados cos que textos de escritores galegos, como Uxío Novoneyra, van facer reflexionar sobre a importancia da recuperación das especies e do idioma.
Non será o único reforzo para potenciar o ecolingüismo e o uso do galego, senón que tamén se repartirán máis de 5000 pegatinas, 5000 chapas, camisolas ou petates cos que facer visible o lema da campaña. “As linguas non son só dos falantes, son de toda a humanidade e hai que responsabilizarse se poden desaparecer”, explicou Valentina Formoso, coordinadora do CGDNL. “Debemos preservar a biodiversidade e o noso futuro. Se a natureza constrúese, enriquécese e renóvase co seu uso, co idioma pasa o mesmo”, conclúe.
Como exemplo da importancia da presenza do galego en todos os eidos, adherido á campaña estivo o ciclista Serafín Martínez, alumno de Empresariais da Universidade de Vigo e deportista do "finado Xacobeo Galicia, un equipo ciclista formado en case a súa totalidade profesionais da comunidade e entre os que o uso do idioma estaba á orde do día", como explicou o vicerreitor de Extensión Universitaria. “Todo o que se poida facer para apoiar o noso idioma será positivo”, sentenciou o ciclista.