María Victoria Carrera, co-autora do libro “Educación sexual. Da teoría á práctica”
“A educación sexual é unha boa ferramenta para alcanzar unha sociedade máis xusta”
A investigadora presentou a publicación xunto á tamén autora María Lameiras
“A educación sexual é unha excelente ferramenta para alcanzar unha sociedade máis xusta de cidadáns críticos e reflexivos, capaces de posicionarse no mundo máis alá dos ríxidos esquemas identitarios heteronormativos baseados nas estruturas de dominación e sumisión”. Así o subliña María Victoria Carrera, profesora en formación da Universidade de Vigo e co-autora do libro Educación sexual. Da teoría á práctica, xunto á tamén docente e investigadora María Lameiras. A obra reivindica unha educación sexual integradora “onde a sexualidade é unha dimensión humana, un valor que precisa ser promocionado e cultivado na escola”. A publicación foi presentada este mércores no transcurso dun acto presidido pola decana da Facultade de Ciencias da Educación, Mercedes Suárez e ao que asistiron as autoras.
María Lameiras subliñou no acto de presentación da obra “a relevancia da educación sexual para a vida e para o noso desenvolvemento como seres humanos”. Neste senso asegurou que o libro que veñen de publicar non pretende dar respostas, “se non que a xente se faga preguntas que lle permitan comprender a necesidade de que a educación sexual debe ser unha realidade”.
Leis que garantan a inclusión da educación sexual na escola
A primeira parte do libro é unha aproximación conceptual e lexislativa na que as autoras presentan un concepto de educación sexual “coherente cunha perspectiva integradora” e na que fan tamén unha análise da lexislación educativa española. Neste senso e aínda que recoñecen que se avanzou significativamente dende os comezos da democracia, “aínda predomina un modelo de sexualidade fortemente bioloxicista e patoloxizado”. As investigadoras aseguran que as leis do sistema educativo español permiten, pero non garanten, unha educación sexual integradora e por iso defenden a necesidade de leis “que posibiliten a inclusión da educación sexual na escola dende unha perspectiva integradora”.Na segunda parte do libro as autoras fan unha proposta metodolóxica para levar adiante unha educación sexual integradora na aula. Dende o perfil do educador sexual, “unha persoa con titulación universitaria no ámbito socioeducativo e/ou psicolóxico con formación sexolóxica posterior”, ata os destinatarios deste tipo de ensino “que deben ser todas as persoas dende a infancia ata a vellez”. Defenden tamén a necesidade de integrar a educación sexual no currículo escolar, “como unha materia obrigatoria ou transversalizada” e apuntan unha serie de obxectivos e contidos da temática como por exemplo recoñecer o carácter flexible da identidade sexual, fomentar actitudes igualitarias, promocionar o coñecemento da diversidade sexual e cultivar unha vivencia saudable da sexualidade. Para ensinar estes contidos propoñen unha metodoloxía constructivista “participativa, adaptada ás características dos destinatarios e que permita a integración de novos coñecementos”.
Cara un modelo integrador onde a sexualidade sexa un valor
María Lameiras e María Victoria Carrera dedican a derradeira parte do libro a analizar os obstáculos e os retos da educación sexual. O modelo moral, que equipara a sexualidade coa culpa e co pecado e o modelo de riscos, que une sexualidade e enfermidade, permiten que aínda hoxe se restrinxa a sexualidade “á reprodución, á xenitalidade e á hixiene” e que baixo a hexemonía da saúde “se ampare un modo de facer educación sexual coital e xenitalizado”. As autoras cren que o medo como estratexia de aprendizaxe “fomenta a pedagoxía do desencontro e da desconfianza do outro” e por iso apuntan como principal reto “camiñar cara un modelo integrador no que a sexualidade sexa vista como un valor, como unha dimensión humana cultivable que permita a pedagoxía do encontro”, declaran.As investigadoras confían en que o libro que veñen de publicar serva de ferramenta "para os docentes, pais e nais e todas aquelas persoas implicadas na educación sexual na súa práctica diaria", conclúen.