Diario da Universidade de Vigo
Na apertura da programación da Intercultural
Emilio Cao presentou, acompañado da súa arpa, o espectáculo "Co mar no meu peto"
A Igrexa de Santa María Nai foi o singular escenario do concerto
A Igrexa de Santa María Nai foi o escenario do primeiro concerto da Intercultural
Emilio Cao presentou o seu espectáculo Co mar no meu peto
Só coa arpa e a súa voz, Cao deleitou aos presentes cunha suite ininterrompida na que fixo un percorrido polas súas composicións máis significativas
O público entregouse ao concerto e amosouse moi satisfeito
A Intercultural deu comezo ás actividades deste segundo cuadrimestre saíndo do campus e abrindo as súas portas á participación de toda a cidadanía, xa que o primeiro concerto da programación tivo lugar este mércores no casco antigo da cidade, nun escenario místico e íntimo como é a Igrexa de Santa María Nai. Emilio Cao foi o encargado de agarimar coa súa música os oídos dos numerosos asistentes que se amosaron totalmente entregados no concerto.
No presbiterio da Igrexa, só coa súa arpa e a súa voz e nun ambiente intimista de luz tenue, Cao presentou o seu espectáculo Co mar no meu peto, unha suite ininterrompida na que o autor fixo un percorrido por algunhas das súas composicións máis significativas, tendo ao mar como referente e nexo. Durante aproximadamente 50 minutos o público trasladouse a un mundo de soños e fantasía, gozando dun tempo de relaxo baixo as notas musicais que habilmente esgrimiu Cao coa súa arpa. O bo ambiente e complicidade que se creou entre público e artista fixo que este alongase o concerto máis do previsto ofrecendo dúas pezas de agasallo.
Para Cao esta foi unha noite especial na que se sentiu moi feliz, “estou encantado de tocar nun espazo tan singular que te fai entrar nunha onda distinta e que a xente captou”. O artista sentiuse moi cómodo no seu primeiro concerto en Ourense, aínda que “resultoume un pouco estraño, xa que teño tocado en moitos lugares por España adiante e sen embargo nunca o fixera aquí, sentín que recuperaba un pouco o tempo”.
Eloxios do asistentes
Entre o público atopábanse persoas coñecidas como as concelleiras Marta Arribas, de Igualdade e Isabel Pérez, de Cultura . Esta última amosouse moi satisfeita tras o concerto, “unha actuación extraordinaria onde Cao fixo un repaso pola súa ampla traxectoria”. A concelleira destacou ademais que “Ourense por fin puido escoitar en directo a este artista nunha noite máxica que nos trasladou aos seus comezos”.Tampouco se perderon o concerto Lois Pardo, de Abana Eventos e os responsables dos Servizos de Deportes e Actividades Culturais do campus, Rodrigo Alberte e Filemón Rivas quen incidiu que na programación da Intercultural deste segundo cuadrimestre “tentamos encher os ocos naquelas áreas que non tocamos na primeira parte e dado que a parte escénica estará ocupada pola MITEU, dedicámonos máis ao plano musical tocando todos os estilos posibles”. Ademais destacou o desexo do campus de abrirse ao resto da cidade, “sempre facemos algunha cousa para achegarnos á cidadanía e que cada vez teñan máis presente o campus universitario”