Empresariais e Turismo pon o acento nas competencias transversais

Coa adaptación dos estudos universitarios ao Plan Boloña, xurdiron no alumnado necesidades formativas específicas aos que os centros deben dar resposta fóra da súa programación de materiais. É o caso das competencias transversais, habilidades persoais, como as comunicativas, que os estudantes teñen que desenvolver para ter éxito académico e profesional. Para dar resposta a estas demandas, a Facultade de Ciencias Empresariais e Turismo de Ourense organizará en febreiro tres obradoiros de formación complementaria nos que afondará en temas como a xestión eficaz do tempo, a redacción de traballos e a busca de emprego.

“Dentro da implantación dos novos graos detectamos a necesidade de formar aos estudantes do centro en competencias non específicas de ningunha materia pero necesarias en todas elas e no conxunto da súa formación. Un alumno do grao de Administración e Dirección de Empresas ten que ter coñecementos de recursos humanos, marketing, etc. pero tamén ten que saber redactar, manexar o tempo ou buscar oportunidades de traballo”, explica Patricio Sánchez, vicedecano de Implantación de Novos Graos da Facultade de Ciencias Empresariais e Turismo e coordinador dos obradoiros.

Tres opcións

A primeira das formación será un Obradoiro de Xestión Eficaz do Tempo que terá lugar o 3 de febreiro coa participación de Juan José Molinos. Durante unha mañá, el será o encargado de amosar aos asistentes técnicas e recursos que lles permitan sacar o máximo proveito a un ben escaso como é o tempo e a realizar xornadas laborais máis produtivas.

Seguiralle o día 10 de febreiro un Seminario de Busca de Emprego e Desenvolvemento da Carreira Laboral impartido por Alejandra Mosteiro. Ante as dificultades que actualmente existen para atopar un posto de traballo, Mosteiro axudará aos participantes a realizar unha análise realista das súas opcións e explicaralles como realizar un plan de acción que lles permita buscar emprego dun xeito metódico. De este modo, aprenderán desde facer un currículo axeitadamente, a usar as redes 2.0 para visibilizarse ou a planificar a procura activa de emprego.

Por último, o 17 de febreiro a Facultade de Ciencias Empresariais e Turismo celebrará un Obradoiro de Elaboración de Traballos Escritos. A profesora do campus de Pontevedra Águeda Gutiérrez será a encargada de ensinar aos alumnos asistentes técnicas para redactar con máis facilidade e calidade os seus traballos académicos e profesionais.

Estas actividades formativas está dirixidas especialmente ao alumnado de cursos ponte e mestrados do centro, aínda que en caso de quedar prazas vacantes abrirase a estudantes de outros cursos. Cada un dos obradoiros conta con 35 prazas dispoñibles que serán cubertas por orde de inscrición na web do centro, estando xa habilitada a posibilidade de apuntarse aos tres obradoiros.