Enxeñaría Agraria recibe a doazón de dous robots para prácticas do seu alumnado

A empresa CIE-Galfor, radicada no Polígono de San Cibrao das Viñas, doou á Facultade de Ciencias do campus de Ourense dous robots KUKA TC300 para o seu uso nas prácticas do alumnado do Grao de Enxeñaría Agraria que se imparte neste centro. Na recepción do material, Pedro Araújo, decano da Facultade de Ciencias, acompañado do director de área do campus Ricardo Bendaña, destacou que esta infraestrutura facilitará a docencia en materias de robótica desta titulación, de xeito especial na súa rama de industrias agrarias. Por este motivo, agradeceu a doazón feita pola empresa e a “especial sensibilidade co noso centro” amosada polo seu xerente, Javier Currás, así como polos seus membros César Magdalena e José Luis Regal.