Esgotadas as prazas para participar no curso de comunicación para investigadores do Campus do Mar

As 45 prazas ofertadas quedaron escasas para as solicitudes de participación no curso de comunicación para investigadores organizado polo Campus do Mar “grazas ao apoio e financiamento do Consello Social“, tal como destacou o director, Emilio Fernández, que subliñou que intentarán repetir este tipo de colaboración. Conscientes da importancia de ser quen de transmitir á sociedade os avances científicos e tecnolóxicos acadados, o curso porá ao día aos investigadores nas ferramentas básicas para transmitir á sociedade o coñecemento que xeran no seu día a día dun modo comprensible, atractivo e ameno. "O Campus do Mar conta cun programa específico de proxección social e, neste marco, é importante mostrarlle á sociedade a investigación que se está a facer", continuou Fernández, quen fixo fincapé na importancia de pór en contacto "os nosos investigadores cos profesionais da comunicación".

A cita será o 19 de outubro no Centro Social Novacaixagalicia e nela os investigadores do Campus do Mar terán a posibilidade de coñecer certas pautas para manter unha canle de comunicación fluída cos medios informativos e coa sociedade en xeral. Cun perfil moi variado no que se inclúen non só investigadores de eidos como as Ciencias do Mar e a Bioloxía, senón tamén de Tradución e Interpretación ou Enxeñaría de Telecomunicación, arredor do 60% dos matriculados son investigadores que traballan en diferentes centros da Universidade de Vigo, completando o listado persoal investigador das outras dúas universidades galegas, o CSIC, o CETMAR e, mesmo, a universidade portuguesa de Porto, entre outras institucións.

Obradoiros prácticos impartidos por xornalistas locais

O encontro, que se desenvolverá no Centro Social Novacaixagalicia, iniciarase coa intervención da xornalista especialista en Educación Milagros Asenjo, xefa de prensa da Universidade Rey Juan Carlos, que impartirá o relatorio A comunicación da ciencia á sociedade. Será a toma de contacto cun tema que se tratará máis polo miúdo nunha mesa redonda que contará coa intervención do decano da Facultade de Ciencias Sociais e da Comunicación da Universidade de Santiago de Compostela, Xosé Pereira; do xornalista e columnista, Ernesto Sánchez-Pombo e do director e presentador de Efervescencia, programa de divulgación científica da Radio Galega, Manuel Vicente.

Divididos en pequenos grupos para facilitar o traballo práctico, o curso inclúe unha serie de obradoiros no que os investigadores recibirán pautas de diferentes xornalistas para saber como enfrontarse a unha entrevista, unha reportaxe ou unha rolda de prensa. Para esta tarefa contarase coa colaboración de tres xornalistas do ámbito local especialistas en temas de educación: Rocío Suárez, de Atlántico Diario; Sandra Penelas, de Faro de Vigo e Ángel Paniagua de La Voz de Galicia. "Son os compañeiros da prensa máis próximos que é con quen máis van interacturar", subliña o director do Campus do Mar.

A sesión da tarde queda reservada para os obradoiros de radio e televisión e, neste caso, serán xornalistas de Radio Vigo Grupo de Comunicación os encargados de amosarlle aos investigadores algún dos segredos dos medios audiovisuais.