Ao abeiro dun relatorio organizado polo Foro de Alumnos de Dereito Estatutario
Estudantes de Dereito coñecen as funcións do Parlamento da man do deputado Puy Fraga
Cualifica á institución como “o punto no que se materializa a esencia da democracia”
O Parlamento de Galicia é a institución onde reside o poder lexislativo da nosa Comunidade Autónoma. Na actualidade este órgano está formado por 75 deputados, ten a súa sede en Santiago de Compostela e ademais de exercer a potestade lexislativa de Galicia cumpre outras funcións entre as que cabe subliñar a de controlar a acción executiva do Goberno galego, aprobar os orzamentos, escoller de entre os seus membros ao presidente da Xunta e esixirlle responsabilidade á Xunta e ao seu presidente. Nas palabras do deputado Pedro Puy Fraga, “o Parlamento segue a ser ese punto no que se materializa a esencia da democracia e que consiste na elección dos representantes do pobo que reflicten as opinións do conxunto da sociedade cuns grupos que apoian o labor do goberno e con outros que presentan unha alternativa e iso é a democracia”, asegura. Deputado polo Partido Popular e profesor na Facultade de Dereito da Universidade de Santiago de Compostela, Puy Fraga ofreceu un relatorio sobre as funcións e a importancia da institución no marco do Estado autonómico este martes na Facultade de Dereito. A actividade estivo organizada polo Foro de Alumnos de Dereito Estatutario, unha iniciativa aberta á comunidade universitaria e ao público en xeral, dirixida polos profesores Jacinto Lareo e Sonia Rodríguez e coordinada por Leticia Barrio co obxectivo de facer un percorrido polas principais institucións sobre as que se apoia a autonomía de Galicia.
Unha institución central en todo sistema democrático
Puy Fraga cualificou ao Parlamento como “unha institución central en calquera sistema democrático” e subliñou da actividade que desenvolve “a enorme cantidade de traballo que se fai e que moitas veces pasa desapercibido, xa que ademais dos plenos hai un labor inxente en comisións de todo tipo, en xunta de portavoces e nas comisións non lexislativas, entre outros cometidos”. Dixo tamén o relator que moitas veces os medios de comunicación só se fixan nos grandes debates “cando hai un traballo continuo de control da acción do goberno, de impulso e de aprobación de normas que na maior parte dos casos pasa desapercibido”, afirmou.Das moitas funcións do Parlamento Puy Fraga fai especial fincapé na súa actividade lexislativa e na de control e impulso ao goberno “xa que forman o núcleo da razón de ser dunha cámara parlamentaria democrática: representar a vontade popular á hora de lexislar e á hora de controlar ao goberno na súa acción política”, asegura. Neste abano de posibilidades Puy Fraga cualifica de “moi importante” o amosar a alternativa que se da dende os grupos da oposición “para que a cidadanía, chegadas as eleccións, poida opinar sobre quen debe gobernar”.
Debates intensos por mor da crise
A actual situación de crise que estamos a vivir amósase tamén na actividade parlamentaria e así o recoñeceu Puy Fraga, que asegurou que “este primeiro ano de lexislatura está a ser especialmente intenso nos debates e polémicas polos problemas que temos, comezando polo do paro, e hai que traballar arreo para resolvelos”. O relator cualificou a problemática do paro como “un drama persoal e social ao que hai que dar unha resposta axeitada dende a política e entre todos”.Moitos dos asistentes ao relatorio de Puy Fraga serán futuros deputados e deputadas, unha profesión que o relator cualificou de “moi gratificante porque permite a posibilidade de levar adiante iniciativas no ámbito público que benefician a toda a sociedade” pero para a que atopou tamén desvantaxes “polos custes persoais que require”. Con todo o deputado animou ao alumnado que teña vocación de dedicarse á política a dar o paso, “porque se entendemos a política como unha profesión que implica traballar polo ben común é unha das actividades máis nobres ás que se pode dedicar unha persoa nova”, asegurou.