Estudantes da Escola de Enxeñería Industrial poñen rumbo ao CERN

Non son tan habituais coma as viaxes de fin de curso, pero hai grupos de estudantes que, movidos polo interese pola ciencia e a formación, organizan excursións académicas. Un exemplo é a visita que realizará un grupo de 47 alumnos e alumnas de 4º e 5º da Escola de Enxeñería Industrial no vindeiro mes de xuño ao CERN, Centro Europeo para a Investigación Nuclear. Acompañados dos docentes David Patiño e Alfonso Caneiro partirán rumbo a Xenebra o día 8 para coñecer estas instalacións punteiras e aproveitarán tamén para visitar a sede da empresa Airbus en Toulouse, Francia. Segundo eles mesmos explican a través dun dos seus representantes, David Rodríguez, “pareceunos moi interesante a idea de visitar un centro de investigación do que se está a falar tanto nestes meses polas recentes achegas”. A viaxe utilizarana para ampliar aos seus coñecementos especialmente en física, “un campo no que durante a carreira non se afonda ata este extremo”. Con todo, eles son conscientes de que “non é moi habitual ter excursións académicas, e moito menos desta magnitude, polo que ver o resultado práctico dos nosos estudos cremos que será moi proveitoso”.

Esta viaxe ten lugar nun ano no que as investigacións e logros do CERN están a ter unha gran difusión mediática, entre eles os traballos sobre a velocidade do neutrino ou o descubrimento do Bosón de Higgs que, os investigadores “agardan que se produza nos próximos meses de xullo e agosto e terá una enorme repercusión entre a comunidade científica internacional”, como apunta David Rodríguez.

A volta a Vigo está prevista o 13 de xuño e para a organización desta visita, os alumnos puideron contactar con persoas, segundo explican “de gran calado”, polo que poderán visitar un dos detectores de partículas, un acelerador de superficie e diversos experimentos punteiros no campo da física de partículas, ademais das exposicións Microcosm e Universe of Particles, que están aberta aos público nas instalacións do CERN. A segunda parada será en Toulouse, onde se achegarán ás instalacións de Airbus para coñecer o lugar onde se ensambla, entre outros, o avión A380, e visitarán tamén o museo desta coñecida multinacional.

O CERN

O CERN, o Centro Europeo de Investigación Nuclear, é unha organización internacional para a investigación de física de alta enerxía, berce do Gran Colisionador de Hadróns (LHC) e de gran número de premios Nobel. Fundado en 1954 por 12 países europeos, o CERN é un dos centros científicos punteiros a nivel mundial e centra a súa actividade na física e en descubrir o funcionamento do Universo, mediante o estudo do que sucede cando as partículas colisionan, os físicos aprender sobre as leis da natureza.

Actualmente conta con 20 estados membros, que comparten o financiamento e a toma de decisións na organización. Outros 28 países participan con científicos de 220 institutos e universidades en proxectos do CERN. Unhas 20.000 persoas traballan para esta institución en Xenebra ou dende diferentes países, entre eles España; no seu Departamento de Enxeñaría, o 4% do persoal é español.