A EXP-UVigo empata co líder e continúa na loita polo campionato galego

A Facultade de Ciencias da Educación e do Deporte viviu esta fin de semana un enfrontamento decisivo na loita polo campionato na máxima categoría do xadrez galego. O primeiro equipo da Escola Xadrez Pontevedra-Universidade recibía ao Xadrez Fontecarmoa de Vilagarcía, que chegaba ao campus como líder da División de Honra, empatado a puntos co Benchosey de Pereiro de Aguiar. Ambos conxuntos viviron un igualado enfrontamento que se saldou cun empate a tres, un reparto de puntos que fai aos de Vilagarcía perder o liderado e que deixa ao equipo pontevedrés a punto e medio da cabeza, mais aínda con opcións de alzarse co título galego.

A principal novidade para o EXP-UVigo Xadrez: Estratexia pola Paz nesta decisiva xornada foi a “volta á casa” de Manuel Pena, formado deportivamente no equipo pontevedrés e egresado da Universidade de Vigo, un dos tres grandes mestres cos que conta o xadrez galego. A participación deste xadrecista, que desde hai unha década desenvolve a súa carreira en Hong Kong, resultou decisiva nun enfrontamento que comezou ben para os universitarios, grazas aos triunfos de Juan Manuel Martínez sobre o mestre FIDE Dan Cruz e do propio Pena. Mais, acto seguido, un “mal día” dos veteranos Pablo García e Daniel Rivera facía que os xogadores do Xadrez Fontecarmoa devolvesen as táboas ao marcador. Con todo igualado e pasadas xa as tres horas de xogo, Alberto Portela perdía o control da posición fronte ao mestre internacional Julio Suárez, o que deixaba aos visitantes moi preto da vitoria final. Non en van, só quedaba por resolverse a partida do seu mellor xogador, o mestre internacional Roi Renaldo que tiña enfronte, como destacan desde o club pontevedrés, a un “inspirado” Rubén Fernández, “que aínda en desvantaxe material, foi complicando a partida ata forzar o erro de Reinaldo”, acadando unha vitoria que situaba o empate a tres final no marcador.

Este resultado fai que o Benchosey recupere o liderado, con 36 puntos, fronte aos 35 do Xadrez Fontecarmoa e os 34,5 da EXP-UVigo. Non obstante, o feito de que os universitarios conten “cun calendario moito máis favorable" mantenos na loita polo título galego a falta de dúas xornadas para o remate da liga. A vindeira fin de semana, o equipo pontevedrés visita a un dos equipos xa descendidos, o Marquiño A de Noia, nunha “moi boa oportunidade para achegarse, ou incluso recuperar, o primeiro posto da xeral”, recoñecen. 

Fóra da División de Honra, a novena rolda da Liga Galega de Xadrez deixou tamén a vitoria do EXP-Ramón Escudeiro Tilve, en Primeira División, e o empate, en segunda, do EXP-Non á violencia de xénero, que lles permite abandonar os postos de descenso directo.