A Facultade de Bioloxía expón na Guarda unha mostra con 800 especies animais

Dende as diferentes especies de marisco que se poden atopar nas rías galegas ata unha ampla colección de bolboretas, pasando por infinidade de insectos, tartarugas, morcegos ou peixes. A diversidade do mundo animal resumida en Expo-Animalia, unha mostra que acolle o Centro Cultural da Guarda, organizada pola Facultade de Bioloxía e a asociación naturalista Baixo Miño, Anabam.
Esta exposición, que se poderá visitar ata o vindeiro 23 de maio, segundo explica Manuel A. Pombal, profesor do Departamento de Bioloxía Funcional e Ciencias da Saúde e vicepresidente de Anabam, “organizámola co gallo do bicentenario do nacemento de Charles Darwin e do 150 aniversario da publicación de El origen de las especies”. A idea xurde como ampliación das actividades desenvolvidas no seo programa da Semana da Ciencia, na que se desenvolveu o concurso de deseño de maquetas de animais artrópodos. “Achegar a Universidade á sociedade, ao público en xeral, é unha obriga de todos os membros da comunidade universitaria”, apunta Pombal, e esta iniciativa, que nace intención de consolidarse ano a ano, “trata de buscar este obxectivo”.
En total son 800 especies diferentes de animais de todo o mundo, “con representación de case todos os filos, 17 en concreto”, explica o profesor, é unha mostra de filoxenia animal, a parte da bioloxía que estuda a evolución das especies de forma global. Unha boa parte da colección, pertencente no seu conxunto á Facultade de Bioloxía, céntrase nos animais de procedencia galega e facilmente recoñecibles para os visitantes cunha ampla representación de crustáceos e moluscos, moitos deles exquisitos manxares das rías galegas. Xunto coa biodiversidade de Galicia, hai un espazo para especies procedentes de partes do mundo moi afastadas como a Antártida, África ou América do Sur. “Moitas destas mostras son traídas por investigadores da facultade que realizan campañas nestas zonas e adoitan traer e especies que poden ser de interese para as actividades científicas e docentes no centro”, apunta Pombal.

Unha mostra divulgativa

A pesar de que finalidade da colección na Facultade de Bioloxía é eminentemente científica e docente, tratouse de dotala dun alto compoñente didáctico para que os visitantes da exposición poidan coñecer algo máis do mundo animal. Para isto instaláronse paneis e carteis explicativos explicando algúns dos datos máis relevantes de cada especie, o número de especies de cada filo ou as partes do animal.
Por outra banda, como explicou Manuel A. Pombal, puxéronse a disposición dos visitantes varios microscopios, algún deles conectado á pantalla dun televisor, que permitirán ver de preto animais comúns como as pulgas ou os piollos, pero que polo seu tamaño reducido non son moi coñecidos.
Expo-Animalia pode visitarse de 10.00 h a 13.00 h e de 17.00 h a 20.00 h de luns a venres e de 10.00 h a 13.00 horas os sábado ata o vindeiro 23 de maio Centro Cultural da Guarda.