A Facultade de Dereito acolle unhas xornadas nas que se definirán os límites entre as distintas ordes xurisdicionais

En España os órganos xudiciais están divididos en cinco grandes grupos, as denominadas ordes xurisdicionais civil, penal, contenciosa-administrativa, laboral e militar, que teñen a misión de xulgar e facer executar a súa decisión. Cada vez que un cidadán acude a un órgano xudicial cunha demanda “o primeiro que debe saber é a cal destas cinco xurisdicións ten que dirixirse”, explica Roberto Bustillo, profesor de Dereito administrativo. Co obxectivo de marcar os límites entre unhas ordes e outras, a Facultade de Dereito, baixo a dirección de Bustillo, acolle as Jornadas sobre fronteras jurisdiccionales que se celebrarán os días 26 marzo e 2 de abril no salón de graos do Edificio Xurídico-Empresarial. “As conferencias planéanse como un complemento académico aos estudos dos alumnos, xa que na universidade hai que facer algo máis que ir a clase e aprobar exames”, comenta Bustillo. Tamén están convidados a asistir aqueles profesionais do dereito interesados en coñecer os supostos “nos que ás veces é difícil saber a que xurisdición dirixirse”.
As xornadas, programadas en dúas tardes para favorecer a asistencia, contarán coa presenza de expertos na materia altamente cualificados, o que contribuirá “a enriquecer a formación dos alumnos”.

Onde están os límites?

As xornadas comezarán o 26 de marzo establecendo os límites entre as xurisdicións contenciosa-administrativa e social, cunha conferencia ofrecida polo presidente da Sala do Social do Tribunal Superior de Xustiza de Cantabria e doutor en Dereito, Rubén López. Tras el chegarán Esther González, secretaria xeral da Universidade de Vigo e María Dolores Fernández, doutora de Dereito procesal para falar dos lindes entre as xurisdicións civil e penal no ámbito da protección de menores.
O día 2 de abril rematarán as xornadas co relatorio do maxistrado da Sala do Social do Tribunal Superior de Xustiza de Galicia, Fernando Lousada, que establecerá as fronteiras entre as ordes social e civil.

A inscrición

As xornadas contan cun límite de 40 prazas e “polo de agora xa están cubertas 32 a falta de que peche o prazo o martes 24”, subliña Bustillo. De carácter gratuíto, poderán asistir tanto alumnos como profesionais recibindo todos eles un diploma acreditativo. A inscrición realizarase nos despachos 3.12 ou 3.22 da Facultade de Dereito ou ven enviando un correo electrónico aos enderezos rbustillo@uvigo.es ou mfprieto@uvigo.es.