Diario da Universidade de Vigo
O próximo domingo, 9 de marzo
Esta fin de semana o campus ten unha cita coa solidariedade no “Maratón de Aerobic”
O recadado irá destinado a campaña “Unidos contra el SIDA” de Unicef
O vindeiro domingo a comunidade universitaria e todos aqueles interesados en colaborar cunha boa causa, teñen unha cita no pavillón universitario do campus de Pontevedra. Logo de ir a votar non virá nada mal facer un pouco de exercicio no Maratón Solidario de Aeróbic, que organiza o Servizo de Deportes en colaboración coa vicerreitoría do campus.
Para poder participar non hai límite de idade nin é necesario ter unha condición física axeitada, simplemente bastará con entregar un donativo económico á entrada do evento. En edicións pasadas recadáronse alimentos ou material escolar, pero a novidade de este ano é que o diñeiro conseguido irá destinado á campaña de Unicef Unidos contra el SIDA para paliar o impacto concreto que está tendo esta enfermidade sobre a infancia.
Segundo explicou a directora de Área de Extensión Universitaria e Estudantes, Ana Belén Fernández Souto, “o obxectivo é implicar á comunidade universitaria e á sociedade en xeral cos proxectos para axudar aos países en vías de desenvolvemento, así como para fomentar a práctica do deporte entre os alumnos”. As previsións de participación por parte da organización son moi boas e tal como comentou Fernández Souto, “esperamos a xente se anime a colaborar con esta iniciativa, xa que ademais de axudar cunha boa causa, pasarán dúas horas moi divertidas”.