Diario da Universidade de Vigo
Universidade, Concello, Fundación VIDE, CSD e federacións de taekwondo reuníronse no campus
O Forum FISU terá en Vigo a súa edición máis multitudinaria con asistentes de 62 países
O Mundial Universitario de Taekwondo contará con 34 delegacións e 290 participantes
Na reunión estiveron presentes representantes da Universidade, do Concello, da Fundación Vide, do Consello Superior de Deportes e da Federación de Taekwondo
No centro, a vicerreitora de Extensión Cultural e Estudantes, Mª Carmen Cabeza
A cinco meses da celebración do Forum FISU e do Mundial Universitario de Taekwondo, as entidades promotoras de ambos eventos seguen avanzando nos aspectos organizativos dos mesmos e xa se pode confirmar que o Forum terá na súa edición de Vigo a máis multitudinaria da historia. Entre o 21 e o 26 de xuño daranse cita na cidade arredor de 400 asistentes de 62 países dos cinco continentes. Segundo explicou a vicerreitora de Extensión Cultural e Estudantes, Mª Carmen Cabeza, tras a xornada de traballo celebrada este mércores no campus, “a aposta da organización é por implicar e estimular a participación das universidades portuguesas e tamén das españolas neste foro do deporte universitario pero, sobre todo, o comité da FISU aposta por darlle ao evento un acento latinoamericano”. Para isto decidiuse establecer colaboracións estreitas cos países do continente que o precisen para favorecer a súa presenza en Vigo no mes de xuño.
A esta xuntanza de traballo asistiron representantes da Universidade, do Concello, da Fundación Vigo en Deporte (VIDE) e dous membros do Consello Superior de Deportes así como das federación española e galega de taekwondo. No transcurso da mesma avanzouse tamén noutros temas de tipo organizativo como aqueles relativos aos desprazamentos e visados dos participantes e “tentaránselle facilitar os trámites a aquelas delegacións que teñan problemas para acadar os permisos precisos”.
O Forum FISU, epicentro do deporte universitario
O programa de actividades do Forum FISU (seminarios, conferencias e debates) repartiranse entre o Centro Social e o Centro Cultural de Caixanova e o campus universitario baixo o lema Deporte universitario, unha plataforma para o cambio. Ao longo dos seis días que dura este simposio afondarase en cuestións que permitan o avance do deporte universitario e, a través del, da sociedade en xeral. Segundo apuntou Cabeza, avanzouse moito na organización científica, “nas propostas dos tema e dos ponentes” pero agora a organización está en contacto coa confederación de decanos de facultades de Ciencias da Actividade Física e do Deporte “para dinamizar os contidos das mesas de debate”.Concretamente, o día 23 será integramente universitario e, mentres o Paraninfo da Reitoría acolle o debate sobre Muller e deporte universitario, no Teatro Vidal Bolaño de Cidade Universitaria celebrarase a Feira de pósters, un encontro de todas as universidades participantes no que cada unha presentará os seus programas de estudos, culturais e deportivos. Segundo apuntou a vicerreitora, paralelamente ao longo desa xornada desenvolverase tamén “unha sesión de xogos tradicionais galegos”.
Mundial Universitario de Taekwondo
A celebración de estes dous eventos deportivos converterán a Vigo entre os días 21 de xuño e 4 de xullo no centro mundial do deporte universitario. Tras a celebración do Forum botará a andar o Campionato do Mundo Universitario de Taekwondo, do 29 de xuño ao 4 de xullo, no que participarán delegacións de 34 países, o que supón un total de arredor de 300 asistentes.Na xuntanza deste mércores, a tarde dedicouse a avanzar na organización deste campionato que terá como sede o pavillón de As Travesas. Este será tamén unha nova oportunidade para que o equipo da Universidade de Vigo se consolide como unha potencia mundial, despois de obter doce medallas no campionato europeo celebrado en Braga no pasado mes de decembro.