ForumEmprego 2012, unha guía para captar as oportunidades laborais que ofrece Europa

As crises agudizan o enxeño e abren fronteiras, sobre todo á hora de buscar emprego alén da contorna máis próxima. Pero existen unha serie de ferramentas que axilizan o proceso e aportan informacións de utilidade nesta busca da empregabilidade. Para coñecelas e entender o seu funcionamento, a Universidade de Vigo, en colaboración coa Rede EURES, organiza dende hai once anos o ForumEmprego Universitario, co obxectivo, como explicaba o reitor, Salustiano Mato, no acto de apertura da nova edición, de “proporcionar as ferramentas necesarias para a inserción laboral do estudantado, utilizando como contorna de referencia o espazo transfronteirizo Galicia-Norte de Portugal”. Estas xornadas desenvólvense ao longo do día de hoxe en Vigo con preto de 130 inscritos e cederán a testemuña mañá mércores ao campus de Ourense e o venres ao de Pontevedra, para o que aínda está aberto o prazo de matrícula.

Competencias imprescindibles

Como explicaba o reitor, “entre as competencias transversais que temos que proporcionar ao noso estudantado está a de desenvolver neles as capacidades necesarias para traballar nun contexto internacional”. Os titulados e tituladas universitarios non poden, segundo Mato, “ignorar esta realidade, mesmo se a decisión é traballar na contorna local, xa que mesmo o tecido produtivo local está completamente integrado nun modelo económico de alcance mundial”.

Na organización deste evento ten unha importancia capital o feito de que a Universidade de Vigo sexa a única de España que conta cunha conselleira da rede EURES de servizos de emprego europeos, Emilia Seoane. A institución conta con esta figura dente 2004 e desenvolve un papel relevante para facilitar a colaboración e cooperación entre os servizos públicos de emprego e o resto dos axentes económicos e sociais representativos da Eurorrexión. Como subliñaba Salustiano Mato, “con este servizo, a comunidade universitaria dispón de información de primeira man sobre a oferta de emprego con vocación transfronteiriza na eurorrexión; sobre as condicións de vida e traballo das traballadoras e traballadores, candidatos ao emprego, estudantes, emprendedores e profesionais transfronteirizos e sobre a oferta de formación e prácticas profesionais a ambos lados da raia”.

Máis de 5000 alumnos e alumnas con currículo Europass

O programa da xornada comezou coa intervención do vicerreitor de Relacións Internacionais, Manuel Fernández Iglesias, que achegou aos asistentes o programa Erasmus Prácticas que permite ao estudantado realizar estadías pre-profesionais en empresas europeas. Tanto para esta formación como para a busca de emprego unha das ferramentas máis útiles é o currículo Europass, ao que se dedica boa parte das sesións da tarde deste ForumEmprego. Segundo indicou o vicerreitor, nos anos que leva celebrándose este foro preto de “5000 estudantes da Universidade elaboraron este documento, o que fai que a nosa institución sexa a máis activa de Galicia e a que conta con xente mellor preparada para este tipo de empregos”. Fernández Iglesias incidiu tamén no traballo que se está a levar a cabo dende a súa vicerreitoría para unir todas as ferramentas e servizos para a empregabilidade en Europa nunha web e animou aos asistentes a ampliar as súas miras e “a poñer o mundo como o voso campo de xogo”.

Xunto con el e o reitor, o acto inaugural contou coa presenza da decana da Facultade de Ciencias Xurídicas e do Traballo, sede das xornadas. Ana Pita destacou o compromiso do centro co progreso e a converxencia de Galicia e o norte de Portugal e salientou, coincidindo co reitor, que “o sur sobrevive a pesar da crise e axudará a Galicia a saír adiante traballando xenerosamente polo futuro”.

Programa da xornada

Entre os contidos do ForumEmprego 2012, os asistentes puideron tamén coñecer as oportunidades de mobilidade profesional e laboral con EURES a través de Teresa González Ventín, coordinadora desta rede para Galicia e o norte de Portugal. A Fundación Galicia-Europa colabora tamén nas xornadas cun relatorio sobre as prácticas e saídas laborais na UE e en organizacións internacionais. O programa inclúe tamén a intervención da conselleira EURES Emilia Seoane e da representante do Departamento de Saídas Profesionais da Universidade de Minho e complétase cos obradoiros prácticos de elaboración do currículo europeo Europass.