Diario da Universidade de Vigo
Ata o 27 de febreiro na sala Alterarte
Fotos, esculturas e maquetas combínanse na exposición "Reliquias"
A sala Alterarte acolle a exposición "Reliquias" de Samuel Castro
As súas obras son o resultado de diversos métodos creativos
O importante para o artista é que cada obra rompa un pouco coa anterior, abrindo novas posibilidades creativas
Castro interésase polos procesos complexos que causan a erosión nos materiais
A mostra permanecerá na sala ata o 27 de febreiro
A sala Alterarte, disposta para todos aqueles novos artistas que queiran amosar os seus traballos, inaugura o ano cunha exposición que xira ao redor da idea do tempo e a natureza. Estes dous eixos son os que inspiraron a Samuel Castro á hora de crear as obras que compoñen a mostra Reliquias, dende a s(a)(o)(u)ciedade @ccidental que se poderá visitar ata o 27 de febreiro.
“O seu traballo é froito de experimentar, empregando o método científico para abordar a realidade”, explicou Ignacio García, comisario da exposición e coordinador do proxecto Alterarte. O artista, Samuel Castro, licenciado en Belas Artes na Universidade de Vigo, interésase polos procesos complexos que causan a erosión nos materiais, as consecuencias do paso do tempo e a metamorfose que sofre a paisaxe. “As súas obras non se pechan por completo ao rematalas, porque cada traballo lévao a outra creación nova”. Para o comisario, Castro é un artista “de taller e de acción, ao que lle gusta experimentar e buscar novas posibilidades”.
En Reliquias apréciase que as pezas que compoñen a exposición proceden de “mesturar diferentes técnicas plásticas e metodolóxicas”, dixo Castro; pódense observar fotografías, esculturas, maquetas e ata vídeos documentais nos que amosa o proceso dalgúns dos seus traballos e que, ao mesmo tempo, son pezas artísticas en si mesmas. A natureza tamén está moi presente na súa obra “pero non no sentido do que máis se fala hoxe en día dela, de ecoloxismo e sustentabilidade” senón que ofrece unha visión crítica. Á hora de expresarse, Castro intenta “que cada obra se diferencie da anterior, non é unha mostra lineal”. Con esta exposición pretende “ que independentemente dos coñecementos de arte que teña o público, se sintan atraídos e gocen do seu traballo”.