Fútbol feminino para visibilizar a participación deportiva da muller en diferentes roles

Os estereotipos de xénero seguen estando moi presentes na vida cotiá, pero quizais un dos ámbitos nos que se manifestan con maior evidencia sexa o deportivo e, en particular, o fútbol, amparados nunhas diferenzas biolóxicas mal interpretadas. Promover prácticas deportivas igualitarias ofrecendo modelos femininos para facilitar a incorporación das mulleres é o obxectivo das actividades complementarias ao programa das Xornadas de Actividade Física e Mulleres. O Servizo de Deportes organiza de xeito paralelo a estas xornadas, promovidas pola Área de Igualdade, tres propostas para facer visibile a participación das mulleres en actividades deportivas e para favorecer a súa incorporación nos diferentes roles: unha competición de fútbol 7 feminino, un curso de adestradoras de fútbol sala e un programa gratuíto de actividade física e saúde para mulleres.

Dinamizadoras do ámbito deportivo

Con estas actividades búscase, segundo o responsable do Servizo de Deportes, Javier Rial, “proporcionar alternativas que se traduzan nunha maior participación das mulleres, non só como deportistas e practicantes, senón tamén como dinamizadoras do ámbito deportivo”. Segundo explicou Rial, prográmanse de xeito paralelo ás Xornadas de Actividade Física e Mulleres para levar á práctica os coñecementos teóricos que se debaterán nos tres campus.
Deste xeito, o día 2 de marzo desenvolverase unha competición de fútbol 7 feminino por grupos no campo de herba sintética da Xunqueira en Pontevedra, para o que remata o prazo de inscrición o venres 19 de febreiro.
O curso de adestradoras e adestradores de fútbol sala terá lugar do 18 de febreiro ao 2 de marzo, a parte teórica na Casa das Campás e a práctica no Pavillón Universitario. Estará impartido por profesionais da Federación Galega de Fútbol e contará cunha proba final para a obtención do título de monitor de fútbol sala. O mínimo de persoas inscritas son 25, das que ao menos 15 deben ser mulleres, e o prazo de matrícula, que ten un custe de 50 euros, remata mañá venres 12 de febreiro.
Por último, as mulleres que asistan ás xornadas terán acceso gratuíto durante o mes de marzo ás salas de cardio-fitness dos tres campus para realizar un programa específico de exercicio supervisado por licenciadas e licenciados en Educación Física.
Para obter máis información ou inscribirse nalgunha destas actividades hai que dirixirse aos pavillóns universitarios de Pontevedra e Ourense, a través dos números de teléfono 986802090 e 988368922 ou dos enderezos de correo electrónico depor-po@uvigo.es e depor-ou@uvigo.es, repectivamente; ou ao Servizo de Deportes en Vigo no teléfono 986811946 e o correo deportes@uvigo.es.