No I Congreso Transfronteirizo Galicia Norte de Portugal na Xestión que hoxe se inaugurou no campus
Galicia e norte de Portugal afondan na procura de fórmulas comúns na xestión dos residuos sólidos
Os seis millóns de habitantes da eurorrexión producen un quilo diario de residuos
Coa exposición das principais medidas levadas a cabo pola Xunta de Galicia e o Concello de Vigo en materia de xestión de residuos, comezou este mércores no Edificio de Ciencias Experimentais o I Congreso Transfronteirizo Galicia Norte de Portugal na Xestión e Tratamento de Residuos Sólidos Urbanos. Na primeira sesión, na que tamén se afonda no panorama da xestión de residuos noutros concellos galegos e portugueses, así como na Universidade de Vigo, os organizadores e participantes puxeron o acento na necesidade de establecer unha colaboración nas dúas zonas neste ámbito, así como a de contar coa necesaria colaboración cidadá.
José Cidrás, vicerreitor de Planificación, puxo de manifesto na súa intervención no acto inaugural, o compromiso da Universidade de vigo no desenvolvemento sostible a través do programa de estudos con graos e mestrados con clara vocación ambiental, así como a través de iniciativas institucionais como o Plan Suma. Pola súa banda os responsables do comité organizador Carlos Franjo e José Luis Legido, agradeceron a colaboración das institucións participantes no congreso e incidiron la necesidade de establecer canles de colaboración transfronteiriza para a xestión de residuos. "Os seis millóns de habitantes da eurorrexión Galicia-Norte de Portugal, teñen problemas comúns," sinalou Calos Franjo, "e un deles son os residuos que contabilizan un quilo por habitante e día". Tanto Franjo como Legido apuntaron que son moitas as empresas que dun e doutro lado da fronteira traballan na xestión de residuos e manifestaron as súas expectativas en materializar colaboracións entre elas a través da exposición de experiencias comúns.
As administracións públicas achegaron as súas medidas para a mellora do servizo
Fernando Asperilla, subdirector xeral de Calidade Ambiental da Xunta de Galicia e Raquel Díaz, concelleira de Economía e Facenda, Limpeza, Parques e Xardíns foron os encargados de expoñer as políticas de xestión de residuos en dúas administracións, unha autonómica e outra local. Asperilla foi o encargado de introducir os relatorios cun repaso á situación da xestión de residuos en Galicia dende os seus comezos, "cando o servizo sufría moitas precariedades", destacando a súa grande evolución coa introdución de notables melloras grazas á Lei 10/97, coa que se puxo en marcha o Plan de Xestión de Residuos e a obrigatoriedade da recollida selectiva, así como a creación da Sociedade Galega do Medio Ambiente. Asperilla salientou ademais a iniciativa proposta pola Xunta sobre o control de vertido de residuos, á que definiu como “un paso moi importante para limitar este feito”. Pola súa banda, Díaz trasladou aos asistentes unha mensaxe do alcalde de Vigo, Abel Cabellero, na que destacou á pertenza do Concello á Rede de Cidades polo Clima e o compromiso da cidade por involucrarse na mellora deste campo a través de medidas como a incorporación de avances tecnolóxicos, a renovación da flota e novas fórmulas de separación de residuos, “propostas coas que impulsamos a recuperación do medio ambiente e o desenvolvemento sostible” apuntou Díaz, quen salientou a necesidade da educación ambiental e a sensibilización e compromiso dos cidadáns resumidas en catro erres: redución do volume de residuos xerados, reutilización, reciclaxe e recuperación enerxética coa conversión súa conversión en combustible.As xornadas estenderanse ata o vindeiro venres
Os relatorios e conferencias continuarán os vindeiros días 17 e 18 de decembro, xornadas nas que se afondará en situacións máis específicas deste campo, como é o caso do papel de Sogama que amosará as súas experiencias no tratamento de residuos así como a valorización enerxética dun combustible derivado destes. Para rematar a segunda xornada, os asistentes ao Congreso participarán nunha visita guiada ás instalacións de Sogama na que coñecerán in-situ a actividade da planta.Na derradeira xornada debateranse os distintos tratamentos de residuos actuais e amosarase a experiencia en xestión do Complexo Medioambiental de Barbanza. O acto de clausura porá de manifesto o compromiso da sociedade co medio ambiente, centrándose na avaliación obxectiva da resposta cidadá na recollida selectiva de residuos urbanos.