A igrexa de Santa Mariña de Augas Santas, principal atractivo dun novo roteiro cultural

Un total de 80 estudantes da Universidade participarán este sábado nun novo roteiro cultural que ten como principal atractivo o santuario de Santa Mariña de Augas Santas, situado na parroquia do mesmo nome do concello de Allariz. Os participantes sairán ás nove da mañá do campus de Ourense para dirixirse a Allariz, lugar de partida da ruta. Será o comezo dunha andaina de 25 kilómetros e de dificultade media-alta que percorrerá O Rexo, Turzas, Santa Mariña, Soutelo e Allariz. O coordinador das Rutas Culturais José García Calvo, “Willy”, asegura que este percorrido vailles resultar aos participantes “moi bonito dende o punto de vista paisaxístico” e fai especial fincapé na posibilidade que ofrece o roteiro de camiñar nas marxes do río Arnoia pola súa beleza e tamén na igrexa de Santa Mariña de Augas Santas, principal atractivo da actividade. Segundo explica,“o que queremos con estas rutas é que os universitarios teñan a posibilidade de facer exercicio cun fin agradable coñecendo moi de preto a enorme riqueza monumental e paisaxística que temos na provincia. Ademais, visitar a igrexa de Santa Mariña de Augas Santas vailles permitir achegarse á nosa historia”, declara.

Intensificar as medidas contra o frío e a choiva

O coordinador das rutas culturais recoméndalles aos participantes intensificar as medidas contra o frío e a choiva levando incluso roupa seca de reposto para dispor dela ao terminar o percorrido. Sen esquecer o chuvasqueiro, o paraugas e a comida (bocadillos, froita, froitos secos e bebidas). Pero se hai algo sobre o que fai especial fincapé é o calzado. Nas súas palabras “o calzado constitúe o 90% da camiñata. Por iso é moi importante utilizar botas gore-tex que garanten a impermeabilidade do pe en andainas tan longas”. “Willy” pídelles aos participantes que esquezan os tenis e as zapatillas de deporte “porque aos cinco minutos estarán empapados” e tamén que non usen dobre calcetín “porque produce ampollas”.
O prazo para apuntarse neste roteiro remata o venres. As inscricións faranse no Servizo de Deportes dos campus de Pontevedra e Vigo e no SIOPE do campus de Ourense.
A próxima andaina do programa é a Ruta da Serra do Xurés, prevista para o día 30 de xaneiro.