A proba é clasificatoria para o Campionato do Mundo Universitario
O Lago Castiñeiras e as rúas do casco vello de Pontevedra acollen esta fin de semana o I Campionato Universitario de Orientación
Con máis de 145 participantes
Dentro dos proxectos da candidatura de Vigo á Universiada de 2013, o Servizo de Deportes trae esta fin de semana a Pontevedra o I Campionato de España Universitario de Orientación, unha iniciativa sen precedentes que “de algún xeito pon de manifesto a boa sintonía que existe entre a Universidade e as autoridades civís”, segundo comentou o vicerreitor do campus de Pontevedra, Jesús Hernández, no acto de presentación do evento. A proba, que acadará este ano unha gran expectación e relevancia por ser unha fase clasificatoria para o Campionato do Mundo Universitario que se celebrará en Tartu (Estonia) do 29 de xullo ao 2 de agosto, desenvolverase nas categorías de homes e damas e estará composta por tres probas: unha carreira de distancia media, outra de distancia longa e unha sprint. As dúas primeiras terán como escenario o contorno do Lago Castiñeiras, pertencente ao concello de Marín, os días 10 e 11 de maio pola mañá e a carreira sprint celebrarase nas rúas do barrio histórico da cidade de Pontevedra, o sábado día 10 a partir das cinco da tarde.
Acompañado polo tenente alcalde de Marín, Manuel Ruibal Pardavila, o alcalde de Vilaboa, José Luis Poceiro, e o responsable de Orientación da Universidade de Vigo, José Luis Armada, na presentación da actividade tamén participou o alcalde de Pontevedra, Miguel Anxo Fernández Lores, quen lembrou que “o feito de que unha parte da carreira se celebre no casco vello é algo excepcional, xa que ao mesmo tempo que se fai deporte pódese apreciar un grandioso percorrido histórico”, comentou na Casa das Campás.
Unha elevada participación
O evento contará cunha alta participación xa que reunirá a un total de 145 deportistas, 64 na categoría de damas e 81 na de homes, de 34 universidades de toda España. A institución viguesa estará representada por catro profesionais, tres na categoría masculina e unha na feminina, todos eles con experiencia en anteriores edicións do campionato e entre os que destaca a figura de Martín Pazó.Na categoría de damas destaca especialmente Esther Gil, de Alicante, actual campiona de España absoluta e unha das corredoras con máis opcións de vitoria, xunto a Ona Refolls, da Universitat de Barcelona, e Alicia Gil, tamén de Alicante. Na categoría masculina parten como favoritos Daniel Portal, da Universidade de Extremadura e Emili Selles, da Politécnica de Valencia, mentres que Néstor Rico, da Universidade de Alicante, podería ter opcións na proba de longa distancia. En canto á representación galega, o corredor da Universidade da Coruña, David Casado, é o que conta con mellores expectativas de acadar unha boa clasificación final.