A loita contra a pederastia en Camboia, eixo da exposición “Había una vez un niño"

Unha imaxe vale máis ca mil palabras, por iso nada mellor que unha exposición fotográfica para abrirnos os ollos sobre a realidade da pederastia en Camboia. Había una vez un niño é o título baixo o que se amosasn máis de 50 fotografías que achegan o traballo que Global Humanitaria realiza na loita contra a explotación sexual dos nenos camboianos. A ollada de Juan Díaz, fotógrafo da exposición, achéganos á vida das vítimas e aos fogares de acollida onde viven e se recuperan moitos dos rapaces que sufren estes abusos. A experiencia deste fotógrafo, que acompañou aos investigadores camboianos, quen en busca de probas percorren día e noita as rúas de Phnom Penh, Sihanoukville e Siemp Reap, ofrece unha visión “que é difícil de esquecer, en ocasións o meu traballo volvíase insoportable”, relatou Díaz durante o coloquio cos alumnos da Facultade de Ciencias da Educación. “As imaxes e historias que vivía cada día afectábanme psicoloxicamente”, engadíu o autor da mostra.
A mostra, que se poderá visitar na primeira planta do Edificio Politécnico ata o 9 de decembro, denuncia o déficit de saúde democrática e xustiza social que padece a poboación camboiana e que deixa á deriva a miles de nenos. Ao tempo ofrece tamén unha unha raiola de esperanza, ao amosar que a loita contra os abusos sexuais e a impunidade dos pederastas comeza a dar os seus froitos.

Que é Protect?

Protect é un proxecto de investigación e denuncia dos abusos sexuais a menores cometidos por estranxeiros que viven ou están de paso en Camboia. Foi posto en marcha no ano 2003 e é unha acción conxunta da ONG española Global Humanitaria e da francesa Action Pour Les Enfants. O labor que realizan incide basicamente en tres aspectos: a investigación de sospeitosos e o apoio á intervención policial, a defensa legal das vítimas e a tutela xudicial dos procesos contra abusadores e a asistencia social aos nenos abusados na que se inclúen os hogares de acollida. Antes da chegada deste proxecto a Camboia a detención e xuizo de pederastas estranxeiros “era algo impensable”, comentou Díaz, pero coa acción de Protect vaise logrando que estes delitos non saían impunes. Un total de 131 expedientes foron abertos desde a creación do proxecto e, coa axuda da policía, máis de 30 pederastas foron xulgados e condeados a prisión polos seus delitos. Por outra banda, Protect ofreceu, desde 2003, asistencia legal e psicolóxica a máis de 140 nenos e contan con tres hogares de acollida no que viven 82 vítimas de abusos sexuais, neles axúdanos a superan as secuelas e reciben unha educación para o seu futuro.