Luz verde á produción da nova lámpada led de baixo custo para alumeado público

Cada noite en España acéndense arredor de dez millóns de farois de alumeado público que supoñen un custe para as administracións, e polo tanto para os cidadáns, de aproximadamente 1000 millóns de euros anuais. Nunha sociedade en crise, que busca fórmulas de maior sustentabilidade desde o punto de vista económico e ambiental, estas cifras poñen sobre o tapete a necesidade de repensar o modelo actual. Buscando solucións tecnolóxicas a esta demanda, un equipo liderado polo catedrático da Universidade de Vigo Humberto Michinel vén de desenvolver unha lámpada led low cost que se podería instalar nos farois xa existentes e que, cunha duración de arredor de 13 anos, permitiría unha redución do consumo eléctrico do 80%. Despois de dous anos de traballo de I+D no deseño da peza e da realización con éxito da proba piloto nun pequeno concello, a lámpada led vén de pasar os test de produción e obter a acreditación necesaria para a súa comercialización. O produto xa está listo para fabricarse en serie e comercializarse.

“Acabamos de conseguir o selo estándar CE para a súa comercialización e o fabricante led Bridgelux testou con éxito a nosa lámpada en Alemaña. Só falta decidir a fórmula de negocio, onde barallamos a posibilidade de crear unha spin off de base tecnolóxica da Universidade de Vigo, e comezar a produción, que se fará nunha empresa ourensá”, explica Humberto Michinel sobre o estado do proxecto, no que tamén participaron o docente da Universidade de Vigo Ricardo Bendaña e o enxeñeiro Eduardo Balvís. “A parte tecnolóxica está feita, xa temos a lámpada. Agora é unha cuestión empresarial, é decidir que marca realizará a explotación comercial do produto”, apunta o responsable do Laboratorio de Óptica Física da Universidade.

A lámpada xa ilumina unha zona do campus de Ourense

O modelo resultante, explica, permite a súa colocación nos farois existentes, ten unha duración aproximada de 55.000 horas, ofrece as condicións lumínicas esixidas pola normativa vixente e segundo os cálculos realizados en dous anos como máximo se amortiza o seu custo co aforro eléctrico acadado, que na actualidade ascende a arredor de 100 euros ao ano por farol. “Despois deses dous anos a lámpada aínda dura dez ou once anos máis nos que todo é aforro”, comenta o físico do campus de Ourense. Tendo en conta que o consumo dos farois públicos supón arredor da metade da factura eléctrica dun concello e que a tecnoloxía led xa está nunha etapa madura, este novo deseño, indica o investigador, preséntase como unha alternativa moi atractiva e moi viable para substituir ás actuais lámpadas do alumeado existente.

Despois de probar con éxito durante un ano e medio un prototipo do produto nunha rúa do concello valenciano de Aldaya, a través da spin off da Universidade de Valencia Energesis, a nova lámpada led xa se pode ver no campus de Ourense. Nun dos farois que iluminan a zona universitaria, nunha rúa preto do edifico onde traballan os físicos ourensáns e ao lado do estanque, a nova lámpada xa está instalada e alumeando polas noites. “Calquera que camiñe pola noite polo parque do campus dáse conta perfectamente de cal é a nosa, pois é a que ofrece unha luz máis potente”, comenta Michinel.

“Estamos moi satisfeitos co deseño feito. A nosa idea foi crear unha lámpada led que cubrise unha cota do mercado o máis ampla posible cun só modelo e que fose economicamente asequible. Nós non inventamos a lámpada nin a tecnoloxía led. O noso traballo foi analizar os problemas que tiñan as lámpadas led que había no mercado, como o seu quecemento e a perda de enerxía que iso supuña, e desenvolver un modelo mellorado que non tivese eses problemas e que ademais ofrecese outras vantaxes tecnolóxicas e económicas”, apunta Michinel. As empresas de servizos enerxéticos, aquelas que asumen a xestión enerxética dun cliente, como pode ser un concello, e que teñen un beneficio económico froito da optimización dese consumo, son, apuntan os creadores desta lámpada, os principais posibles clientes deste novo produto froito da I+D+i feita na universidade e que nace a raíz do contacto co sector privado e do coñecemento das súas necesidades reais.