Os nenos e nenas da Escola Infantil do campus disfrazáronse este venres de flores
Margaridas, xirasoles e papoulas para celebrar a chegada do Entroido
Compartiron con pais e nais e coa comunidade universitaria unha tarde de lecer
Polo Parque Medioambiental da cidade, situado no corazón do campus de Ourense, este venres paseáronse unhas flores moi particulares. Con grandes pétalos de cores e en bonitos testos, margaridas, xirasoles e papoulas anticipáronse á chegada da primavera poñendo unha nota de alegría aos xardíns universitarios. Eran os nenos e nenas da Escola Infantil do campus, que quixeron celebrar a chegada do Entroido disfrazados deste xeito e compartir con pais e nais e coa comunidade universitaria en xeral unha tarde de lecer.
“Os rapaces de cero a un ano van disfrazados de papoulas, os de un a dous anos de xirasoles e os de dous a tres anos de margaridas”, explicou Bibiana González, responsable da escola infantil. Segundo destacou, aínda que os máis pequenos non puideron axudar ás docentes do centra a elaborar as vestimentas, si o fixeron os máis grandes, que puxeron o seu gran de area coloreando algunha das pezas que conformaban os disfraces.
Deste xeito, despois de vestirse e maquillarse na gardería e con algo de nerviosismo polo estraño da situación, os pequenos e pequenas realizaron un desfile ata chegar á entrada do Edificio Xuridico-Empresarial, onde pais, nais e outros familiares os agardaban expectantes e coas cámaras de fotos preparadas. Unha vez dentro do edificio, os nenos e nenas cantaron para os seus familiares varias cancións, atrevéndose incluso cunha en inglés. Ante o sorriso de familiares e membros da comunidade universitaria que por alí pasaban, os máis pequenos do campus de Ourense puxeron en escena toda a súa creatividade e sobre todo moita naturalidade.