Medio milleiro de persoas pasarán un día de outono nas illas Cíes da man do programa CampusMar Life

Lonxe dos centos de turistas que desembarcan nas illas Cíes durante o verán, o arquipélago durante o outono ofrece unha panorámica máis tranquila, onde a propia natureza se impón aos visitantes e a vida do parque natural se pode contemplar sen interferencias. Por iso esta é a época elixida polo Campus do Mar para organizar unha visita divulgativa ao Parque Natural das Illas Atlánticas, unha actividade que se enmarca dentro do programa CampusMar Life, que busca fomentar a relación co mar no seu tempo de lecer das persoas que viven e traballan arredor do Campus do Mar.

Esta iniciativa está organizada en colaboración coa Asociación de Oceanógrafos de Galicia, que celebra o seu 5º aniversario, e coa celebración tamén do 10º aniversario do Parque Nacional Marítimo-Terrestre das Illas Atlántica de Galicia.

A visita, que terá lugar mañá 1 de decembro, tras ser adiada por mor das condicións meteorilóxica da pasada fin de semana, pechou o prazo de inscrición ao ter esgotadas as 500 prazas dispoñibles. A excursión constará de dous roteiros divulgativos da man de expertos monitores e cun prezo de 5 euros. Unha vez no parque , os guías, voluntarios da Asociación de Oceanógrafos de Galicia, acompañarán aos participantes en dous roteiros que permitirán descubrir características e curiosidades do arquipélago, descoñecidas para a maioría do gran público.
Os menores de 14 anos deberán ir acompañados dun adulto, mentres que o que teñan entre 16 e 18 deberán achegar un permiso paterno. A saída será as 09.30 horas dende Vigo e o regreso está previsto para as 17.30 horas e a organización aconsella levar comida, roupa cómoda e de abrigo, calzado adecuado para camiñar, un impermeable e protección solar e gafas de sol.

Toda a información está dispoñible na web do Campus do Mar