A primeira saída, o 18 de outubro, percorrerá as termas ourensás
O medio natural e o deporte únense coa volta das Rutas Culturais pola provincia
Ao longo do curso realizaranse un total de 11 itinerarios
Co comezo do novo curso volve unha cita ineludible para todos os amantes da natureza, o deporte e o patrimonio: os Roteiros Culturais. En vista do seu éxito, ano tras ano o Servizo de Deportes organiza diferentes itinerarios a pé polos lugares máis senlleiros de Galicia, conxugando o sendeirismo co coñecemento cultural e histórico da contorna. Nesta ocasión, a programación consta de11 saídas diferentes das que a maioría se desenvolven na provincia de Ourense e que inclúen ademais dúas novidades: a ruta Currosiana e a de Aciveiro-Candán. Pero serán as termas ourensás as que o día 18 de outubro inauguren a oferta de visitas, que ata maio percorrerán Pena Corneira, o Mosteiro de San Pedro de Rocas, a zona do Ribeiro, a Serra do Xurés, a Ribeira Sacra, os Canóns do Sil, Montederramo e O Incio.
Malia o que poida parecer, os percorridos, de arredor de 20 quilómetros, non requiren dunhas condicións físicas determinadas, xa que a actividade está aberta a todo o mundo e a súa filosofía é adaptarse ao ritmo do máis lento. Este ano, ademais, o programa conta cunha morea de agasallos para motivar aos participantes, entre os que se atopan guías das rutas culturais, camisetas a mesmo estancias de fin de semana. E coma sempre, aos estudantes que descubran o entorno natural galego cos roteiros concederáselles un crédito de libre configuración por cada dúas rutas, ata un máximo de dous créditos.
As termas ourensás abren o curso
As termas ourensás da Chavasqueira e Outariz abren a programación dos Roteiros Culturais deste ano o vindeiro 18 de outubro. O percorrido, duns 18 quilómetros de distancia, está clasificado como de dificultade baixa e inclúe ademais unha parada para realizar un baño termal. Por este motivo, é imprescindible levar traxe de baño, toalla e chancas, ademais da habitual roupa cómoda e calzado axeitado para camiñar. Asemade, recoméndase levar un chuvasqueiro ou paraugas e unha muda e, ademais, cada participante encargarase da súa comida e bebida. Os interesados poden apuntarse no Servizo de Deportes dos campus de Vigo e Pontevedra e no SIOPE en Ourense.Información para os interesados
Para calquera das rutas, a matrícula estará aberta ata o martes anterior a cada saída, que terán lugar dous sábados alternos de cada mes. A inscrición pode formalizarse no Servizo de Deportes de calquera campus e o prezo para unha ruta é de 8 euros para os membros da comunidade universitaria e de 13 para os usuarios externos. Ademais, os que se matriculen para varias saídas poderán beneficiarse dunha redución: o prezo de 9 roteiros é de 59 euros e 99 euros segundo se trate ou non de membros da Universidade, mentres que se a matrícula comprende o programa completo sería de 70€ e 115€, respectivamente.Os autobuses sairán do Edificio Politécnico do campus de Ourense ás 9.00 horas da mañá e o regreso ao punto de partida será sobre as 17.00 horas. Ademais, haberá autobuses dende Pontevedra e Vigo para trasladar aos participantes ata a cidade das Burgas.
Máis información