Miguel Diéguez, nomeado novo vicexerente do campus de Ourense
Traballará na liña da súa antecesora seguindo o camiño da descentralización
Miguel Diéguez é, dende esta semana, o novo vicexerente do campus de Ourense, substituíndo no cargo á anterior responsable, Beatriz Cuíña. Licenciado en Dereito, este lugués de 37 anos asume o posto de xestor como “un reto” na súa carreira profesional “con moita ilusión e moi agradecido ao vicerreitor por confiar en min para desempeñar este cargo”. O novo vicexerente conta cunha ampla experiencia en postos de xestión, polo que o traballo non é descoñecido para el. De momento, Diéguez está a poñerse ao día con todos os plans e proxectos do campus, “aínda estou aterrando e estudando todo o que deixou feito a miña antecesora”.
No desenvolvemento do seu labor, o vicexerente manterá unha liña de continuidade co traballo de Cuíña, tentando conseguir para o campus todas as melloras posibles; ademais seguirá traballando no camiño da descentralización “co obxectivo de racionalizar o funcionamento, sempre en coordinación coa xerencia de Vigo”.