O movemento ‘Spanish Revolution’ chega ao campus dan man de sete directores de cinema independente

Sete curtametraxes, realizadas por algúns dos creadores máis destacados do cine periférico estatal, proxectáronse este martes na Facultade de Ciencias Sociais e da Comunicación ante o alumnado do Grao en Dirección e Xestión Pública e máis do mestrado en Dirección Pública e Liderado Institucional, convidándoos a reflexionar e achegándoos aos movementos sociais máis recentes e ás causas que os orixinaron. O grupo de investigación Observatorio da Gobernanza (G3) da Universidade de Vigo achegou ata o campus pontevedrés, xunto coa Asociación de Cinema Documental e a Vicerreitoría, esta sesión de curtas denominada Spanish Revolution, “nun intento por observar, analizar e comprender a través destas pezas unha sociedade debilitada pola crise e a rapiña política e financieira”, explicou o programador de DOCMA, David Varela.

Despois de pasar pola Rambleta de Valencia, o MARCO, o Museo de Arte Contemporáneo de Castela e León, a Térmica de Málaga e incluso a cidade de New York, da man da Universidade Carlos I, este ciclo de curtametraxes chega agora a Pontevedra. O nexo que une todas e cada unha das pezas que compoñen Spanish Revolution “é unha mirada crítica e nada compracente sobre a crise económica, as súas consecuencias e as reaccións sociais que estas traen consigo, afastándose dos convencionalismos cinematográficos e da propaganda”, subliñou David Varela. Trátase pois dun conxunto de visións moi persoais sobre o contemporáneo onde o risco, o humor, a experimentación e a subxectividade creativa van da man.

Ao remate do visionado, os profesores da Facultade de Ciencias Sociais e da Comunicación, Enrique Varela, Álvaro López Mira e Beli Martínez intercambiaron opinións co alumnado presente no salón de graos sobre as curtas e o movemento 15-M ou tamén chamado Spanish Revolution. O decano do centro, Juan Manuel Corbacho, tamén quixo participar neste debate audiovisual achegando a súa visión ao respecto antes do visionado das pezas.

As orixes dun ciclo viaxeiro

Coincidindo co segundo aniversario da creación do movemento social e das protestas multitudinarias do 15 de maio, a Asociación de Cinema Documental levou a diferentes puntos de España, Europa e Estados Unidos unha escolma de curtametraxes que falan directa ou indirectamente destes movementos, das causas que os orixinaron, do seu presente e da súa continuidade dende a perspectiva dalgúns dos directores máis destacados do cinema independente estatal entre os que destacan o propio programador do DOCMA, David Varela, Flavio G. García, Jorge Tur Moltó, Guillermo G. Peydró, o Colectivo Los hijos ou Isaki Lacuesta.