O mundo das artes escénicas achégase aos máis pequenos nas datas de Nadal

Ourense, un referente galego no mundo das artes escénicas, non se esquece dos nenos. Por iso, coincidindo coas vacacións de Nadal, a quinta edición da MOTI, Mostra de Teatro Infantil, chega á cidade. Marionetas, zancudos, acróbatas e títeres encherán dende o xoves 25 e ata o 30 de decembro o tempo de ocio dos pequenos da casa. Esta mostra, única en Galicia, sitúase como unha aposta tanto do Concello de Ourense, a Deputación Provincial e a Universidade de Vigo por “formar espectadores de teatro desde as idades máis temperás”, explicou Fernando Dacosta, organizador da MOTI e director da Aula de Teatro Universitario. Esta faceta pode observarse especialmente na programación de teatro para bebés, “é o segundo ano que incluímos estas representacións xa que na anterior edición tiveron moito éxito”, dixo Dacosta.
Danza, teatro, marionetas de fíos e títeres suporán un total de 20 espectáculos ofrecidos por 13 compañías distintas. O Teatro Principal, o Auditorio Municipal e o salón multiusos do Edificio de Ferro serán os escenarios elixidos para as representacións. Os prezos oscilarán entre os tres e catro euros e “parte da recadación estará destinada a ONG UNICEF”, comentou Dacosta.
A pesar de que as representacións teatrais non comezan ata o día de Nadal, a MOTI xa se deixa sentir con accións de promoción en colexios e garderías. A partir do sábado día 20 e ata o 23 de decembro serán as rúas da cidade as que gocen de “pequenos actos teatrais, moi sinxelos pero cun vestiario vistoso”, un xeito “de chamar a atención e convidar a adultos e nenos a participar da MOTI”, engadiu Dacosta.
Ata o de agora “existe bastante expectación e a xente demanda información sobre o programa”, comentou o organizador da mostra; por iso “espero e confío que siga tendo os espectadores doutros anos que enchían as representacións”.

Teatro para bebés

Este tipo de espectáculos está a acadar moito éxito nos últimos tempos, os organizadores da MOTI conscientes deste feito comezaron na anterior edición a incluílos na súa programación e este ano continúan nesa liña con dúas representacións, Anda e Pacama, de Katarsis e La casa incierta respectivamente. Estas obras teatrais, recomendadas para bebés de seis meses a tres anos, “traballan con estímulos sensoriais, o diálogo non ten tanto importancia como o ritmo, o movemento ou a música”, explicou Dacosta. As representacións, “pensando na etapa evolutiva en que se atopa un neno destas idades”, indicou Dacosta; rompen coa barreira entre escenario e espectadores, “os actores póñense ao mesmo nivel que os bebés, incluso se deitan ou agachan para que eles non teñan que mirar sempre cara arriba”. Esta modalidade das artes escénicas é un xeito de “introducir aos nenos desde pequenos no hábito de acudir ao teatro”, concluíu o organizador.

Nacemento da MOTI

A MOTI celebra nesta edición o seu quinto aniversario. O seu nacemento foi grazas á proposta realizada polo exvicerreitor do campus de Ourense, Andrés Mazaira, e Filemón Rivas, técnico de Actividades Culturais que desexaban ter algunha actividade para nenos. A elaboración deste proxecto correu a cargo de Fernando Dacosta e a raíz del xurdiu tanto a MOTI como a Aula de Teatro Infantil Gepetto que precisamente “é unha das compañías que colabora en cada edición da mostra, nesta ocasión coa representación da obra Rescuita e o reino dos sentimidos”, aclarou Dacosta.
Para o organizador da MOTI, “é moi importante crear espectadores dende a base”; neste senso “a Universidade de Vigo é unha pioneira xa que non existe outra que aposte tanto polo teatro infantil”.