A obra gaña o 'II Concurso de Intervencións Artísticas' do campus
Un mural 'En Rede' dará a benvida ao Edificio Xuridico-Empresarial
Os seus creadores son Delio Rodríguez e Salvador Neira
Na proposta presentada a concurso os creadores explican que o seu deseño parte da “idea de rede, conectividade, globalidade, colectividade, pluralidade... termos que hoxe máis que nunca están dun modo ou doutro presentes nas nosas vidas”. Con este concepto de fondo Rodríguez e Neira propoñen “un mapamundi inspirado nos mapas web das redes sociais, que na actualidade conectan á poboación mundial como se se tratase dun gran cerebro colectivo en continua sinapses”.
A obra instalarase nas dúas paredes laterais da entrada do edificio, cunhas dimensións cada unha delas de arredor de 6 por 3 metros, e no espazo frontal superior que as une. Nelas quedará reflectido, empregando pintura plástica a aerógrafo e pincel, o planeta terra mesturado con formas abstractas semellantes a unha rede neuronal. “Potenciarase a estrutura da sala, fomentando a magnificencia da mesma e acentuando o concepto de conexión entre longas distancias” apuntan Rodríguez e Neira.
21 propostas presentadas
Ao premio, dotado con 3000 euros, presentáronse un total de 21 propostas de expresións artísticas moi diferentes, desde o mural, como a obra gañadora, á escultura. Para a elección da obra gañadora, o xurado, composto por representantes do campus de Ourense e de expertos do eido artístico, valorábanse especialmente aspectos como a conexión da obra coa contorna, a interacción co edificio e o emprego de materiais que contribuísen á sostibilidade ambiental.Unha vez executada, a intervención será a segunda que se realice froito do Concurso de Intervencións Artísticas do campus. Na primeira edición desta convocatoria resultou gañadora a obra Formas Naturais, do artista Lasha Makharadze, que acondicionou un dos muros exteriores da biblioteca universitaria cuns grandes insectos que se teñen convertido nun elemento moi representativo deste centro.