A mostra xa está aberta ao público no Centre El Carme
"Oito_artistas.gal" completa o seu itinerario en Girona
A exposición Oito_artistas.gal chega á súa última parada, o Centre El Carme de l’Ajuntament de Girona. O vicerreitor do campus de Pontevedra e o comisario da exposición, Xosé Manuel Buxán Bran, acudiron á cidade catalá para a inauguración da exposición.
Deste xeito, a mostra itinerante completa o seu percorrido por diversos puntos de España e Portugal. En abril a mostra botou a andar na sala de exposicións da Universidad de León. O centro de Arte Joven da Comunidad de Madrid e o espazo Maus Hábitos de Porto tiveron a oportunidade de coñecer as obras dos novos artistas galegos antes de que a mostra recalase na Sala X da Facultade de Belas Artes, anterior parada de Oito_artistas.gal.
Ignacio García Gómez del Valle, Jorge Migoya, María Blanco, Nuria Ruibal, Pablo Sande, Sonia Tourón, Tamara Feijoo e Víctor Hugo Costas son os artistas cuxas obras integran esta exposición, que pretende dar a coñece o pulo creativo e a forza e o interese da creación galega que se produce na facultade. Sen que exista unha temática común a todas as obras, a mostra recolle propostas de vídeo, debuxo, escultura, fotografía, gravado, audiovisual ou estilo libre.