A partir do 22 de xaneiro na Sala X
“Oito_artistas.gal” despídese de Porto e prepárase para visitar Pontevedra
O vicerrector do campus, Jesús Hernández, acudiu á festa de peche
Novo punto e seguido na mostra itinerante de novos artistas saídos da Facultade de Belas Artes Oito_artistas.gal. A exposición despediuse de Porto, terceira parada do seu percorrido pola península, e xa se prepara para presentarse na Sala X da Facultade de Belas Artes o 22 de xaneiro. O vicerreitor do campus de Pontevedra, Jesús Hernández, o decano da Facultade de Belas Artes, Ignacio Barcia; o comisario da exposición, Xosé Manuel Buxán; e os artistas da mostra estiveron presentes na festa celebrada con motivo do peche.
Ignacio García Gómez del Valle, Jorge Migoya, María Blanco, Nuria Ruibal, Pablo Sande, Sonia Tourón, Tamara Feijoo e Víctor Hugo están detrás deste proxecto que, comisariado polo profesor Buxán e co apoio da vicerreitoría do campus, pretende dar a coñecer o pulo creativo, forza e o interese da creación galega que se produce na facultade dándolles a oportunidade de presentarse en novos espazos expositivos peninsulares. Sen que exista unha temática común a todas as obras, a mostra está integrada por todo tipo de formatos como vídeo, debuxo, escultura, fotografía, gravado, audiovisual ou estilo libre. Os traballos falan do pensamento e da razón das cousas representadas, como na serie fotográfica de Ignacio García Gómez; o placer das formas e das sensacións de Jorge Migoya ou a insubmisión, rebeldía e plasticidade hard de Pablo Sande, Tayo. A proposta fotográfica de María Blanco pasa pola necesidade do ser humano de contos e fábulas e os retratos de Nuria Ruibal amosan metáforas da vida. Mediante os debuxos de Tamara Feijoo achegámonos ao lado máis perverso e Víctor Hugo amosa os seus xogos de cores, proporcións, multiplicación de instantáneas e recomposicións. A mostra tamén inclúe a arte corporal de Sonia Tourón, froito do seu compromiso coa propia biografía intelectual e persoal da artista e desta relación no proxecto artístico.
A mostra xa pasou pola sala de exposicións da Universidade de León, o centro de Arte Joven da Comunidade de Madrid e o espazo Maus Hábitos de Porto. Logo da súa estancia en Pontevedra, pechará percorrido no Centre El Carme de Girona, onde permanecerá do 12 de febreiro ao 10 de marzo.